Chiqindilarni boshqarish va sirkulyar iqtisodiyotni rivojlantirish agentligi

Loyihaning navbatdagi qahramoni Xorazm viloyati “Toza hudud” davlat muassasasi Bog‘ot tumani filialining maxsus texnika haydovchisi Xudayberganov Odilbek Masharibovichdir.

Odilbek Xudayberganov sanitar tozalash sohasida 6 yildan ortiq vaqt davomida xizmat qilib kelmoqda. Qahramonimiz tong sahardan kech tushgunga qadar aholi turar joylari, ko‘chalarga tashlab ketilgan chiqindilarni maxsus chiqindi tashuvchi texnikani bosqarish orqali kerakli manzilga olib borib, bartaraf qiladi.

“Ilgari texnikalar eski va yetishmas edi. Hozir zamonaviy, yangi texnikalar berilyapti. Chiqindilar ham avvalgidan ancha ko‘paydi — bu esa odamlarimizni ekologik madaniyati oshgani, ekologiya sohasiga e'tibor kuchayganini bildiradi. Ekologiyamizni kelgusi avlodlarimiz uchun hammamiz toza saqlab, himoya qilishimiz kerak” — deydi qahramonimiz.

Odilbek Xudayberganov mashaqqatli va fidokorona mehnatlari tufayli 2023-yilda “Tabiat himoyachisi” ko‘krak nishoni bilan taqdirlangan. 

Umrini insonlarning og‘irini yengil qilish, ekologiya, atrof-muhitni ozoda saqlashga bag‘ishlagan. Odilbek Xudayberganov bugun 3 farzandning otasi, naveralar qurshovidagi oila boshi.

Ming afsuski, ko‘cha-ko‘yda duch kelgan joyga chiqindi tashlab ketaveramiz, ammo bu xatti-harakatimiz atrof-muhitning ifloslanishiga sabab bo‘lishini, kimlardir shu chiqindilarni har qanday ob-havoda tozalashi haqida o‘ylab ham ko‘rmaymiz. Shunday ekan, yurtdoshlarimizni chiqindilarni belgilangan joylarga tashlashga, atrof-muhitni ifloslantirmaslikka, shu sohada xizmat qilayotgan Odilbek Xudayberganov kabi insonlarning mehnatini qadrlashga chaqiramiz.