Chiqindilarni boshqarish va sirkulyar iqtisodiyotni rivojlantirish agentligi

Jumladan, Chiqindilarni boshqarish va sirkulyar iqtisodiyotni rivojlantirish agentligi direktori Sharifbek Hasanov hamda Qoraqalpogʻiston Respublikasi Joʻqorgʻi Kengesi va Vazirlar Kengashi mutasaddi rahbarlari hamda agentlikning Qoraqalpog‘iston Respublikasi hududiy boshqarmasi va mahalliy hokimlik organlari mas'ullari ishtirokida Nukus shahrida bu boradagi bir qator muhim uchrashuvlar o‘tkazildi.

Xususan, Xitoy investorlari bilan ekosanoat hududi loyihasi bo‘yicha uchrashuvda Xitoyning "Beijing China Sciences Runyu Environmental Technology" korxonasi rahbariyati va mutaxassislari ham qatnashdi.

Muzokaralar davomida:

• Qoraqalpog‘istonda tashkil etilishi rejalashtirilgan ekosanoat zonasi loyihasi bo‘yicha hujjatlarni ishlab chiqish;
• Loyiha doirasida hamkorlikni yo‘lga qo‘yish va uni amalga oshirish mexanizmlari muhokama qilindi.

Shuningdek, mutaxassislar ekosanoat zonasi uchun belgilangan yer maydonini bevosita joyiga chiqib, hududning infratuzilma holati hamda loyiha talablariga muvofiqligi yuzasidan dastlabki baholash va o‘rganish ishlarini amalga oshirdi.

Kun tartibida sanitar tozalash xizmatlari sifati ham alohida nazoratda bo‘lib, xizmat safari davomida soha mutasaddilari mahalliy hokimliklar bilan hamkorlikda hududda faoliyat yuritayotgan sanitar tozalash korxonalari vakillari bilan uchrashdi.

Unda asosiy e’tibor maishiy chiqindilarni yig‘ish va olib chiqish xizmatlari sifatini yaxshilashga qaratildi. Aholiga qulay sharoitlar yaratish jarayonida yuzaga kelayotgan tizimli muammolar atroflicha tahlil qilinib, ularni bartaraf etish yuzasidan aniq chora-tadbirlar belgilab berildi.

Ma'lumot uchun: agentlik direktori Sharifbek Hasanov boshchiligidagi ishchi guruh 2026-yil aprelgacha qator hududlar, jumladan, Qoraqalpogʻiston Respublikasida sanitar tozalash korxonalari faoliyatini tahlil qilib, yangi hududlarni biriktirish va xonadonma-xonadon targʻibot ishlarini tashkil etishga masʼul etib belgilangan.