“Yil ayoli-2025”: Samarqandlik tozalik posboni Prezident sovgʻasini qo‘lga kiritdi
2025-12-24 13:40:00 / Yangiliklar
Bugun Oila va xotin-qizlar qo‘mitasi tomonidan “Yil ayoli” milliy tanlovi hamda “Eng namunali xotin-qizlar faoli” tanlovining Respublika bosqichi g‘oliblarini taqdirlash marosimi o‘tkazildi.
Quvonarlisi, “Yil ayoli-2025” milliy tanlovida Samarqand viloyati Kattaqoʻrgʻon shahridagi “Anvarjon business invest” MCHJ sanitar tozalash korxonasi rahbari Gulmira Jumayeva Gran-pri sohibasi bo‘ldi.
Avval xabar berganimizdek, (https://t.me/sanitationuz/2724) qahramonimiz Gulmira Jumayeva uzoq yillar davomida Rossiya Federatsiyasida mehnat migratsiyasida boʻlib, chiqindilarni qayta ishlash korxonasida faoliyat yuritgan. 2016-yilda Vatanga qaytib, orttirgan tajribasini yurtimiz manfaatlariga yoʻnaltirdi hamda atrof-muhit ifloslanishining oldini olish, aholidan chiqadigan maishiy chiqindilarni olib chiqib ketish barobarida ularni saralash va qayta ishlashga qaratilgan samarali faoliyatni yoʻlga qoʻydi.
Shu o‘rinda, chiqindilarni boshqarish sohasidagi hamda atrof-muhit muhoafazasi yo‘lidagi saʼy-harakatlari eʼtirofi sifatida joriy yilda u “Tabiat himoyachisi” koʻkrak nishoni bilan taqdirlangandi (https://t.me/sanitationuz/2415). (https://t.me/sanitationuz/2415)
Sanitar tozalash xizmati fidoyisi davlatimiz tomonidan tadbirkorlik uchun yaratilgan keng imkoniyatlardan unumli foydalangan holda, bugungi kunda 5 ta masʼuliyati cheklangan jamiyatni tashkil etib, 450 ga yaqin yoshlar va xotin-qizlar uchun doimiy ish oʻrinlari yaratgan.
Ishlab chiqarish quvvatlarini kengaytirish maqsadida Xitoy Xalq Respublikasidan 100 ming AQSH dollari miqdorida zamonaviy asbob-uskunalar olib kelingan boʻlib, soʻnggi 5 yilda korxonalarida 178 milliard soʻmlik mahsulot ishlab chiqarildi.
Yuksak tashabbuskorlik, ekologik masʼuliyat va samarali tadbirkorlik faoliyati uchun oliy oʻrin — Gran-priga munosib deb topilgan Gulmira Jumayeva Oʻzbekiston Respublikasi Prezidentining sovgʻasi — avtomobil bilan taqdirlandi. Sovrin Bosh vazir o‘rinbosari — Oila va xotin-qizlar qo'mitasi raisi Zulayho Maxkamova tomonidan tantanali ravishda topshirildi.
Munosib e’tirof bilan sanitar tozalash xizmati fidoiylaridan bo‘lgan hamkasbimizni Agentlik rahbariyati va jamoasi nomidan samimiy qutlab, yuksak muvaffaqiyatlar tilaymiz!