Chiqindilarni boshqarish va sirkulyar iqtisodiyotni rivojlantirish agentligi

Chiqindilarni boshqarish va sirkulyar iqtisodiyotni rivojlantirish agentligi hamda Yevropa Ittifoqi tomonidan moliyalashtirilayotgan FAO bilan hamkorlikda Jizzax viloyatida “Pestitsidlar va boshqa xavfli kimyoviy moddalar bilan ishlashda shaxsiy himoya vositalarining ahamiyati va ulardan to‘g‘ri foydalanish” mavzusida seminar-trening tashkil etildi.

Seminar-trening Yevropa Ittifoqi tomonidan moliyalashtirilayotgan FAOning “Xavfli kimyoviy moddalarni samarali boshqarish bo‘yicha texnik ko‘mak” loyihasi doirasida o‘tkazildi. Unda viloyatdagi “Zaharli kimyoviy va boshqa xavfli moddalar maxsus poligoni” hamda Ekologiya va iqlim o‘zgarishi hududiy bo‘linmasi xodimlari ishtirok etdi.

Jarayonda soha xodimlariga pestitsidlarning toksikologik guruhlari, respublikada ro‘yxatga olingan turlari, ularning inson organizmiga kirish yo‘llari va salomatlikka ta’siri, shaxsiy himoya vositalari turlari va ulardan to‘g‘ri foydalanish, zaharlanish turlari hamda birinchi yordam ko‘rsatish choralari bo‘yicha batafsil ma’lumotlar taqdim etildi.

Shuningdek, trening davomida shaxsiy himoya vositalarining har bir elementi bo‘yicha amaliy demonstratsiyalar o‘tkazilib, himoya vositalarini to‘g‘ri kiyish va yechish, tozalash hamda texnik xizmat ko‘rsatish tartiblari amaliy jarayonda ko‘rsatib berildi.

Yakunda loyiha doirasida maxsus poligon xodimlariga beg‘araz yordam sifatida shaxsiy himoya vositalari komplekti (respiratorlar, filtrlar, maxsus oyoq kiyimlari, qo‘lqoplar, kaskalar, himoya ko‘zoynaklari va kombinezonlar) taqdim etildi.