Chiqindilarni boshqarish va sirkulyar iqtisodiyotni rivojlantirish agentligi

Xabaringiz bor, joriy yilning 14-oktabr kuni Prezident Shavkat Mirziyoyev raisligida o‘tkazilgan mahalla tizimini yana-da takomillashtirish va joylarda ishlarni samarali tashkil etish masalalari yuzasidan videoselektor yig‘ilishida butun respublikada tozalik va ozodalik oyligi eʼlon qilingan edi.

Shu o‘rinda, bir oy davomida har bir shahar va tumanlar bo‘ylab ko‘chalar, xonadonlar, ko‘p qavatli uylar, ijtimoiy obyektlar, idora va tashkilotlar atrofida jadal tozalash ishlari amalga oshirildi.

Bu borada, hududlardagi jarayonlar Ekologiya, atrof-muhitni muhofaza qilish va iqlim o‘zgarishi vazirligi hamda Chiqindilarni boshqarish va sirkulyar iqtisodiyotni rivojlantirish agentligida tashkil etilgan respublika ishchi shtabida umumlashtirilib, Bosh prokuratura, Ichki ishlar vazirligi, Milliy gvardiya, turli vazirlik hamda idoralar hamkorligida olib borildi.

Jumladan, O‘zbekiston bo‘ylab 15-oktabrdan — 15 noyabrgacha o‘tkazilgan “Tozalik va ozodalik” oyligi doirasida hududlar jami 422,4 ming tonna chiqindidan tozalanib, bartaraf etildi.

Tozalik tadbirlari doirasida 95 213 ta MFY hududi, shuningdek, 60 631 ta jamoat joyi tozalandi.

Obodonlashtirish ishlarida sanitar tozalash xizmati hamda obodonlashtirish sohasining jami 368,8 ming nafar xodimlari ishtirok etdi.

Bundan tashqari jarayonlarga 66 291 ta maxsus chiqindi tashuvchi va yuklovchi texnika jalb qilindi.

Bir oy davomida Prokuratura, IIB, Milliy gvardiya va Ekologik davlat nazorat inspeksiyasi xodimlari ishtirokida jami 448 ming huquqbuzarlik holati aniqlanib, tegishli tartibda chora ko‘rildi.

Tozalik tadbirlarida 100 dan ortiq hamkor tashkilotlarning 70 301 nafar xodimlari faol qatnashib, yurtimiz obodligiga munosib hissa qo‘shdi.

Eslatib o‘tamiz, sanitar tozalash xizmati sifati hamda chiqindilarni boshqarish sohasiga oid taklif va murojaatlaringiz bo‘lsa, ularni Chiqindilarni boshqarish agentligining 1205 ishonch raqamiga 24/7 rejimda qoldirishingiz mumkin.