Chiqindilarni boshqarish va sirkulyar iqtisodiyotni rivojlantirish agentligi

Sanitar tozalash xizmatlari sifatini oshirish va toʻlov intizomini mustahkamlash maqsadida 2026-yil 1-yanvardan boshlab qattiq maishiy chiqindilarni toʻplash va olib chiqib ketish xizmatlari uchun haq toʻlashning yangi tartibi joriy etilishini ma’lum qilamiz. Mazkur tartibga koʻra, endilikda sanitar tozalash sohasida iste’molchilardan faqatgina ko‘rsatilgan xizmatlar uchun to‘lov hisoblanadi.

Isteʼmolchilar (jismoniy va yuridik shaxslar) tomonidan qattiq maishiy chiqindilarni toʻplash va olib chiqib ketish boʻyicha xizmatlar uchun onlayn toʻlov tizimlari orqali amalga oshiriladi.

Onlayn toʻlov tartibi quyidagi afzalliklar bilan muhim sanaladi:
- istalgan joyda va vaqtda amalga oshirish mumkin;
- bankka borish va navbatda turish shart emasligi bilan vaqtni tejaydi;
- hisobni oson tekshirish va nazorat qilish mumkin;
- toʻlov cheklarini onlayn yuklab olish mumkin;
- xizmat koʻrsatish jarayonida shaffoflikni taʼminlash barobarida xizmat uchun noqonuniy toʻlov undirish, undirilgan mablagʻlarni kirim qilmasdan oʻzlashtirish holatlarini bartaraf etish orqali sohada yashirin iqtisodiyot hamda korrupsion holatlarning oldini olishga xizmat qiladi.

Shuningdek, qattiq maishiy chiqindilarni toʻplash va olib chiqib ketish boʻyicha xizmatlar uchun to‘lovlardan tushgan mablag‘lar bevosita Chiqindilarni boshqarish va sirkulyar iqtisodiyotni rivojlantirish agentligining maxsus hisob raqamiga yo‘naltiriladi. 

Jamlangan mablagʻlar hisobidan haq toʻlash belgilangan subyektlar (sanitar tozalash korxonalari, poligonlar, chiqindi yoqish zavodlari, ekosanoat hududlari va boshqalar)ga alohida tartibga muvofiq hisobga olishning yagona tizimi orqali:
- sanitar tozalash korxonalariga qattiq maishiy chiqindilarni poligoniga yoki chiqindilarni qayta yuklash punktlariga topshirgani uchun (alohida tartib asosida tonna/kilometr hisobida);

- chiqindi poligonlariga/chiqindilarni qayta yuklash punktiga/chiqindilarni yoqish zavodiga chiqindilarni qabul qilgani va utilizatsiya qilgani uchun (tonna hisobida);

- ekosanoat zonalarida faoliyat yurituvchi tadbirkorlik subyektlariga (har bir tonnasi uchun) belgilangan tartibda to‘lab beriladi. 

Natijada mablag‘larning maqsadli sarflanishi, tizimda moliyaviy intizom va nazoratning kuchaytirilishi ta’minlanadi. Qolaversa, har oy yakuni bilan xizmat koʻrsatuvchi sanitar tozalash korxonalari faoliyatining asosiy samaradorlik koʻrsatkichlari baholab boriladi. 

Baholash natijasida sanitar tozalash korxonalari “qizil”, “sariq” va “yashil” toifalarga ajratiladi. Mazkur toifalar sanitar tozalash korxonalari uchun haq toʻlashda inobatga olinadi. Yaʼni samaradorlik koʻrsatkichi yuqori baholangan “yashil” toifadagi sanitar tozalash korxonalariga “qizil”, “sariq” toifadagilarga nisbatan koʻproq haq toʻlanadi. Bu tartib sanitar tozalash korxonalarining KPI ko‘rsatgichlari asosida aniqlanadi.

Ta’kidlash joizki, mazkur tartib sanitar tozalash sohasida ko‘rsatilgan xizmatga yarasha munosib haq toʻlanishi va xizmatlar sifatining oshirilishi barobarida aholi roziligiga erishishga hamda sirkulyar iqtisodiyotni rivojlantirishga xizmat qiladi.