Jizzax viloyati Paxtakor tumani hokimligi

Paxta yig‘im-terimi va g‘alla ekish mavsumiga tayyorgarlik masalalari muhokama qilindi

Jizzax viloyatida paxta yig‘im-terimi mavsumini uyushqoqlik bilan o‘tkazish, yetishtirilgan hosilni qisqa muddatlarda va sifatli yig‘ib-terib olish, shuningdek, kelgusi yil hosili uchun boshoqli don ekinlarini ekishga tayyorgarlik masalalariga bag‘ishlangan yig‘ilish bo‘lib o‘tdi.
 

Paxtakor tumanidagi “Semrug‘” paxtachilik klasteri paxta dalasida o‘tkazilgan yig‘ilishda shahar va tuman hokimlari, qishloq xo‘jaligi sohasi mas’ullari, paxta-to‘qimachilik klasterlari rahbarlari hamda mutasaddi tashkilotlar vakillari ishtirok etdi.

Yig‘ilishda dastlab paxta hosilini qisqa muddatlarda yig‘ib-terib olishga tayyorgarlik holati atroflicha tahlil qilindi.
Ta’kidlanganidek, joriy yilda viloyatda 73,1 ming gektar maydonda g‘o‘za parvarishlanib, 400 ming tonna paxta hosili yetishtirish mo‘ljallangan. Hosilni 30 kun muddatda yig‘ib-terib olish uchun 350 dona paxta terish mashinasi talab etilishi qayd etildi.

Ayni paytda mavjud 302 dona texnika hisobidan terimni tashkil etish imkoniyatlari ko‘rib chiqilib, yetishmayotgan 48 dona paxta terish mashinasini qo‘shimcha jalb qilish bo‘yicha vazifalar belgilandi.

Shuningdek, paxta maydonlarini desikatsiya qilish, terimga tayyorlash, mavjud OVX va dronlardan samarali foydalanish, paxta terish mashinalariga GPS va kuzatuv kameralarini o‘rnatish, zarur miqdorda tirkamalar hamda ortish texnikalarini ta’minlash masalalari ko‘rib chiqildi.

Paxta qabul qilish maskanlarining mavsumga tayyorligi ham alohida muhokama qilindi. Viloyatda 26 ta paxta qabul qilish maskani mavsumga tayyor holatga keltirilgani qayd etildi. Maskanlarda paxtani qabul qilish jarayonini uzluksiz tashkil etish, laboratoriya xulosalarini o‘z vaqtida rasmiylashtirish va fermerlarga qulay sharoit yaratish bo‘yicha tegishli vazifalar berildi.

Yig‘ilishda paxta terimini moliyalashtirish, yoqilg‘i ta’minoti, fermerlarga paxta uchun 80 foizlik to‘lovlarni amalga oshirish, mexanizatorlarga ish haqini o‘z vaqtida to‘lash masalalariga ham e’tibor qaratildi.

Yig‘ilishning ikkinchi asosiy yo‘nalishi kelgusi yil hosili uchun g‘alla ekishga tayyorgarlik masalalari bo‘ldi.

Ma’lum qilinganidek, kelgusi yil hosili uchun viloyatda 80,4 ming gektar maydonga boshoqli don ekinlari ekish, bundan tashqari, 100 ming gektar lalmi maydondan foydalanish rejalashtirilgan. G‘alla maydonlarini suv bilan yaxshi ta’minlangan hududlarga joylashtirish, har bir tuman va fermer xo‘jaligi kesimida rejalarni qayta ko‘rib chiqish bo‘yicha vazifalar belgilandi.

Shuningdek, g‘alla maydonlarini Agroplatforma axborot tizimiga to‘liq kiritish, fermer xo‘jaliklarini kredit mablag‘lari bilan ta’minlash, Xitoydan don ekish seyalkalarini olib kelish va ularni moliyalashtirish masalalari ko‘rib chiqildi.

G‘alla ekish uchun zarur bo‘lgan urug‘lik don, mineral o‘g‘it va yoqilg‘i ta’minoti masalalari ham muhokama qilinib, mavsumni sifatli tashkil etish yuzasidan mas’ullarga aniq topshiriqlar berildi. Viloyatda 28,1 ming tonna urug‘lik don talab qilinishi, mahalliy urug‘likning to‘liq tayyorlangani hamda Rossiya Federatsiyasidan 3,5 ming tonna urug‘lik don olib kelish belgilanganligi ma’lum qilindi.

Yig‘ilish yakunida paxta yig‘im-terimi va g‘alla ekish mavsumini belgilangan muddatlarda, uyushqoqlik bilan va mavjud imkoniyatlardan samarali foydalangan holda o‘tkazish, aniqlangan kamchiliklarni bartaraf etish hamda belgilangan vazifalar ijrosini qat’iy nazoratga olish bo‘yicha mas’ullarga tegishli topshiriqlar berildi.