Energetika vaziri “Huawei” kompaniyasining bosh ofisida raqamli energetikani rivojlantirish loyihalari bilan tanishdi

Tashrif chog‘ida delegatsiya energetika sohasini rivojlantirish bo‘yicha innovatsion yechimlar bilan tanishdi. Shundan so‘ng “Huawei” ko‘rgazmalar markazi, turli maqsadlardagi quyosh elektr stansiyalari uchun invertorlar va qayta zaryadlanuvchi akkumulyatorlar ishlab chiqaruvchi “Huawei Digital Power” ishlab chiqarish quvvatlari bo‘limi bo‘ylab ekskursiya tashkil qilindi.

Energetika vaziri ushbu kompaniyaning energetika sohasida raqamli loyihalarni amalga oshirish bo‘yicha jahon tajribasi bilan tanishish doirasida “Huawei Global Energetika” biznes bo‘limi prezidenti Sun Fuyu bilan uchrashuv o‘tkazdi.

Unda tomonlar o‘rtasida o‘zaro hamkorlik hamda O‘zbekistonda raqamli va energetika texnologiyalari integratsiyasini oshirish, ekotizim ishtirokchilari va tadbirkorlar uchun «yashil» energiyani ishlab chiqarish, quyosh energiyasi hisobiga yirik korxonalarni elektrlashtirish kabi masalalar muhokama markazida bo‘ldi.

Ma’lumot o‘rnida, 2022 yilning sentyabr oyida Energetika vazirligi va "Huawei Uzbekistan" kompaniyasi o‘rtasida o‘zaro anglashuv memorandumi imzolangan. Unga ko‘ra, tomonlar uzoq muddatli va o‘zaro manfaatli hamkorlikni yo‘lga qo‘yish ko‘zda tutilgan.