O‘zbekistondagi AES loyihasi tarmoq barqarorligini kuchaytiradi

Tadbirda O‘zbekiston Respublikasi Bosh vaziri o‘rinbosari Jamshid Xo‘jayev o‘z nutqida atom energetikasini rivojlantirishga qaratilgan chora-tadbirlar, mamlakatimizdagi ilk atom elektr stansiyasini qurish loyihasi doirasida olib borilayotgan ishlar, bu borada tomonlar hamkorligiga to‘xtalib o‘tdi.

- O‘zbekiston ko‘p yillardan buyon uranning muhim ishlab chiqaruvchilaridan biri hisoblanadi. Mamlakatimiz hissasiga dunyo zahiralarining taxminan 4 foizi to‘g‘ri keladi va yiliga 3,5 ming tonnadan ortiq qazib olinadi.

Mamlakat yirik ishlab chiqaruvchilar qatorida mustahkam o‘rin egallab keladi va global yoqilg‘i siklida ishonchli hamkor bo‘lib qolmoqda. Ana shu asosiy sanoat tajribasi esa sohani rivojlantirishning yangi bosqichiga xizmat qilyapti.

Bugun O‘zbekiston Prezidenti Shavkat Miromonovich Mirziyoyev tashabbusi bilan mamlakatimiz o‘z atom generatsiyasini yaratishga o‘tmoqda. Bu ko‘p qirrali yo‘nalishga ega. Bir maydonda ikkita yirik quvvatli (1000 MVt) reaktor va ikkita kichik (55 MVt) reaktor quriladi.  

Bunday yondashuv bir vaqtning o‘zida 2,1 GVt bazaviy generatsiya va manyovrchan quvvatlarni ta’minlaydi. 2035 yilga kelib, 525 gektar maydondagi stansiya yiliga 15 milliard kVt/soatdan ortiq elektr energiyasi ishlab chiqaradi. Bu loyiha energetika diversifikatsiyasi strategiyasining bir qismi.  

2030 yilga kelib, O‘zbekistonda toza energetika ulushi 40 foizdan oshib ketishi kerak va AES bu maqsadga katta hissa qo‘shadi. Shu bilan birga, qayta tiklanadigan manbalar bo‘yicha ham loyihalar amalga oshirilmoqda.  

Bir maydonda katta va kichik bloklarning kombinatsiyasi tarmoq barqarorligini kuchaytiradi, integratsiyani yengillashtiradi. Katta bloklar barqaror bazaviy generatsiyani ta’minlaydi, kichik bloklar esa pik yuklamalarni qoplaydi hamda quyosh va shamol stansiyalarining noaniq ishini muvozanatlaydi.  

AES nafaqat "yashil" energiya manbai, balki tizim yaratuvchi ob’ekt sifatida ham xizmat qiladi.  

Alohida yo‘nalish - kadrlar tayyorlashdir. Bu tizim maktabdan boshlab, oliy va keyingi ta’limni qamrab oladi. Toshkentdagi MIFI filiali asosiy tayanadigan o‘quv muassasasi hisoblanadi. 2030 yilga qadar filialda 300 dan ortiq talabalar mutaxassislikka ega bo‘ladi. 

Jizzax viloyatida AES qurilishi nafaqat elektr quvvati ishlab chiqarishni oshiradi, balki butun mintaqani industrial rivojlantirishga xizmat qiladi. Qurilish jarayonida 12 mingdan ortiq ish o‘rni yaratiladi, ekspluatatsiya davrida esa 2 mingdan ortiq yuqori malakali ish o‘rni ta’minlanadi. 

Bu loyiha mintaqada katta investitsiyalar jalb qiladi, infratuzilma rivojiga turtki beradi. Biz xalqaro hamkorlikka ochiqmiz. MAGATE o‘z ko‘magi va qo‘llab-quvvatlashini bildirdi.  

Atom elektr stansiyasi O‘zbekistonning yangi industrializatsiyasi ramziga aylanadi, energetika modernizatsiyasi harakatlantiruvchisi va mamlakatlarimiz hamkorligi uchun mustahkam poydevor bo‘ladi,- dedi o‘z nutqida J.Xo‘jayev.