Mazkur tadbir 2023-yil 19-mayda Xitoyning Sian shahrida boʻlib oʻtgan “Markaziy Osiyo – Xitoy” formatidagi birinchi sammitida Davlatimiz rahbari tomonidan Markaziy Osiyo davlatlari va Xitoyning huquqni muhofaza qilish idoralari oʻrtasida yaqin hamkorlikni yoʻlga qoʻyish boʻyicha takliflarining ijrosini taʼminlash maqsadida tashkil etilayotganligi alohida taʼkidlandi.

Soʻnggi yillarda mamlakatimiz Ichki ishlar vazirligining Xitoy Jamoat xavfsizligi vazirligi bilan aloqalari kengayib, xalqaro terrorizm, ekstremizm va transmilliy jinoyatlarga qarshi kurashish hamda jamoat xavfsizligini taʼminlash boʻyicha tizimli hamkorligi yangi bosqichga koʻtarilgani, bu jarayonda vazirliklar oʻrtasida axborot va oʻzaro tajriba almashish, kadrlar malakasini oshirish hamda ikki tomonlama tashriflar jadal amalga oshirilayotgani eʼtirof etildi.

Tadbirda tomonlar terrorizm va ekstremizm, giyohvand moddalarning noqonuniy savdosi hamda boshqa turdagi transmilliy jinoyatlarga qarshi kurashishda hamkorlikni kuchaytirish, kiberjinoyatlarga qarshi kurashish va raqamli kriminalistika yoʻnalishida ichki ishlar organlari xodimlari uchun maxsus oʻquv kurslarini tashkil etish, Vazirlik tarkibida yangi tashkil etilgan Kriminologiya tadqiqot instituti bilan Xitoy Jamoat xavfsizligi vazirligining 4 ta ilmiy tadqiqot markazlari oʻrtasida oʻzaro hamkorlikni yoʻlga qoʻyish kabi muhim masalalarni muhokama qildilar.

Uchrashuv yakunida ikki vazirlik oʻrtasida 2024-2025-yillarga moʻljallangan oʻzaro hamkorlik toʻgʻrisidagi Dastur imzolandi.

Doʻstona va konstruktiv ruhda oʻtgan uchrashuvda oʻzaro hamkorlikni rivojlantirish borasida istiqbolli vazifalar belgilab olindi.