Tashqi ishlar vaziri Qirg‘iz Respublikasiga tashrif buyurdi

Tashrif doirasida delegatsiya Qirg‘iz Respublikasi Prezidenti Sadir Japarov tomonidan qabul qilindi.

Uchrashuvda O‘zbekiston Respublikasi Prezidenti Shavkat Mirziyoyevning samimiy salomlari Qirg‘iz Respublikasi Prezidentiga yetkazildi.

Mamlakatlarimiz o‘rtasidagi strategik sheriklik va qardoshlik munosabatlari misli ko‘rilmagan sur’atlar bilan rivojlanayotgani, barqaror taraqqiyot uchun eng qulay shart-sharoitlar yaratilgani alohida ta’kidlandi. Davlatlarimiz Rahbarlarining tinimsiz sa’y-harakatlari tufayli ikki tomonlama kun tartibida hal etilmagan masalalar qolmaganligi e’tirof etildi.

Shuningdek, kun tartibi keng qamrovli bo‘lib, istisnosiz barcha yo‘nalishlarni o‘z ichiga olgani, infratuzilmadan tortib gumanitar sohalargacha bo‘lgan qo‘shma loyihalarning nafaqat ikki mamlakat manfaatlariga, balki butun mintaqa va undan tashqaridagi hududlarga xizmat qilayotgani qayd etildi.

Tashrif davomida vazir hamkasbi Qirg‘iz Respublikasi tashqi ishlar vaziri Jeenbek Kulubayev bilan alohida uchrashuv o‘tkazildi.

Uchrashuvda strategik hamkorlikni, ayniqsa savdo-iqtisodiy sohalar va chegaraoldi infratuzilmasini rivojlantirish yo‘nalishlarini chuqurlashtirish masalalari muhokama qilindi. Mintaqaviy integratsiya va barqaror rivojlanish borasida harakatlarni muvofiqlashtirish yuzasidan fikr almashildi.

Muzokaralar yakunida O‘zbekiston Respublikasi Prezidentining Qirg‘iz Respublikasiga bo‘lajak davlat tashrifiga tayyorgarlik bo‘yicha qo‘shma harakatlar rejasi hamda Tashqi ishlar vazirliklari o‘rtasida 2025–2026 yillarga mo‘ljallangan hamkorlik dasturi imzolandi.

O‘zbekiston va Qirg‘iziston Tashqi ishlar vazirliklari tomonidan barcha erishilgan kelishuvlarning to‘liq amalga oshirilishini ta’minlash yo‘lida yaqin hamkorlik davom ettiriladi.