Oliy taʼlim, fan va innovatsiyalar vaziri JICA bosh direktori oʻrinbosari bilan muzokaralar oʻtkazdi

Tomonlar O‘zbekiston-Yaponiya yoshlar innovatsiya markazining institutsional boshqaruvi va mustaqil rivojlanish salohiyatini kuchaytirish masalasida muzokaralar olib bordilar.

Uchrashuvda O‘zbekiston-Yaponiya yoshlar innovatsiya markazini rivojlantirish dasturining 1-bosqichida amalga oshirilgan ishlar natijalari muhokama qilindi hamda loyihaning 2-bosqichiga start berishga kelishildi. Shuningdek, JICA agentligi bilan hamkorlikni kengaytirish, ta’lim jarayoniga o‘qituvchi ko‘ngillilarni jalb etish, qisqa muddatli o‘quv dasturlari va kurslarini tashkil etish, ta’lim yo‘nalishida istiqbolli qo‘shma loyihalarni amalga oshirish kabi masalalar ko‘rib chiqildi.

Ta’kidlash joizki, Yaponiya xalqaro hamkorlik agentligi (JICA)ning Texnik hamkorlik loyihasining I-bosqichi doirasida Yaponiyaning Nagoya, Sukuba, Keyo, Akita, Kyushu, Teykio, Yokoxama universitetlari hamda Tokio, Nagoya, Shibaura texnologiya institutlarida 15 nafar yosh ilmiy tadqiqotchilari malaka oshirish va magistratura hamda doktorantura PhD bosqichlarida tahsil olishdi. MIRAI jamg‘armasi mablag‘lari hisobidan 9 ta ilmiy tadqiqotlar amalga oshirish uchun mablag‘lar ajratildi. Bundan tashqari, ko‘plab xalqaro konferensiyalar, seminarlar, treninglar tashkil etildi, Yaponiyaning qator nufuzli oliy ta’lim muassasalari hamda ilmiy tadqiqot institutlari bilan hamkorlik memorandumlari imzolandi.