Saudiya Arabistoni kompaniyalari bilan 20 mln AQSH dollari qiymatidagi hamkorlik yoʻlga qoʻyildi

“ACWA Power” bilan imzolangan hujjatga koʻra, kompaniya 2030-yilgacha Sirdaryo viloyatidagi Shirin energetika texnikumiga investitsiya mablag‘larini yo‘naltirgan holda xalqaro standartlarga javob beradigan kadrlar tayyorlash tizimini yoʻlga qoʻyadi. Loyiha doirasida taʼlim sifatini oshirish, moddiy-texnik bazani mustahkamlash va Energetika hamda suv akademiyasi (EWA)ning ikki yillik taʼlim dasturini integratsiya qilgan holda zamonaviy oʻquv dasturlarini ishlab chiqish kabi ustuvor vazifalarni amalga oshirish belgilangan.

“DataVolt” axborot texnologiyalari kompaniyasi bilan erishilgan kelishuv esa raqamli infratuzilma sohasini rivojlantirishga qaratilgan. Unga koʻra, Shirin energetika texnikumida Maʼlumotlar markazi sanoati uchun isitish, shamollatish va havo sovutish (HVAC) hamda elektromexanik muhandislik yoʻnalishlarida kadrlar tayyorlashga ixtisoslashgan zamonaviy oʻquv dasturlari joriy etiladi. Shuningdek, taʼlim muassasasi zamonaviy infratuzilma va texnik uskunalar bilan jihozlanadi, oʻqituvchilarni moddiy ragʻbatlantirish choralari koʻriladi.

Ushbu hamkorlik memorandumlari Oʻzbekistonda kasbiy taʼlim tizimini xalqaro standartlar darajasida isloh qilish, oʻquv jarayonlarini zamonaviy talablarga moslashtirish va mehnat bozorida raqobatbardosh mutaxassislar tayyorlashga xizmat qiladi.