O‘zbekiston Respublikasi Investitsiyalar, sanoat va savdo vaziri Laziz Kudratov “Arnest guruhi” kompaniyasi vakillari bilan uchrashuv o‘tkazdi.

Tomonlar qo‘shma korxonalar tashkil etish va zamonaviy texnologiyalarni joriy etish orqali hamkorlikni mustahkamlash yo‘llari yuzasidan fikr almashdilar.

“Arnest guruhi” — Rossiyadagi aerozol mahsulotlari, atir-parfyumeriya va kosmetika vositalari, maishiy kimyo hamda alyuminiy qadoqlovchi mahsulotlar ishlab chiqaruvchi eng yirik kompaniyalardan biridir. Guruh tarkibiga mashhur brendlar ostida faoliyat yuritayotgan zamonaviy ishlab chiqarish quvvatlariga ega korxonalar kiradi. Ular nafaqat Rossiya, balki xalqaro bozorlarda ham faol ishlamoqda.

Tomonlar yuqori texnologiyali mahsulotlar ishlab chiqarish, texnologik tajriba almashinuvini chuqurlashtirish va O‘zbekistonda ishlab chiqarishni mahalliylashtirishni kengaytirish borasidagi loyihalarni rivojlantirishga qiziqishlarini bildirdilar.

Uchrashuv yakunida O‘zbekiston Respublikasi va “Arnest guruhi” o‘rtasida hamkorlikni yanada rivojlantirish bo‘yicha kelishuv imzolandi.