O‘zbekiston va Vyetnam ishbilarmon doiralari ishtirokida davra suhbati bo‘lib o‘tdi

Mazkur tadbir O‘zbekiston Respublikasi Bosh vazirining o‘rinbosari Jamshid Xo‘jayev va Vyetnam Sotsialistik Respublikasi Milliy Majlisi raisi Chan Txan Man raisligida o‘tkazildi.

Uchrashuvda ikki mamlakat vazirlik va idoralari rahbarlari, jumladan, O‘zbekiston Respublikasi Oliy ta’lim, fan va innovatsiyalar vaziri Q. Sharipov, birinchi o‘rinbosar Sh. Daliyev hamda Vyetnam delegatsiyasi tarkibidagi qator vazirlar va ularning o‘rinbosarlari ishtirok etdi.

Tadbir davomida tomonlar o‘zaro manfaatli hamkorlikni yanada kengaytirish, savdo-iqtisodiy aloqalarni chuqurlashtirish hamda ta’lim va fan sohalaridagi istiqbolli tashabbuslarni muhokama qildilar.

Davra suhbati yakunlariga ko‘ra, 2025–2026 yillarda O‘zbekiston va Vyetnam o‘rtasida ikki tomonlama hamkorlikni rivojlantirish bo‘yicha Qo‘shma harakatlar rejasi imzolandi. Mazkur hujjatda oliy ta’lim va ilm-fan sohalari bo‘yicha quyidagi muhim yo‘nalishlar belgilab olindi.

Xususan, oliy ta’lim muassasalari o‘rtasida to‘g‘ridan-to‘g‘ri aloqalarni yo‘lga qo‘yish, ikki mamlakat fuqarolari uchun ta’lim grantlari ajratish, Vyetnamda “Ta’lim va fan kunlari”ni tashkil etish hamda yarim o‘tkazgichlar fizikasi va mikroelektronika kabi ilg‘or sohalarda qo‘shma tadqiqotlar olib borish va ilmiy rahbarlikni amalga oshirish kabi tashabbuslar belgilangan.