O‘zbekiston va Yaponiya: manfaatli sheriklik sari

Mazkur uchrashuv davomida ikki davlat o‘rtasidagi agrar sohadagi hamkorlikni mustahkamlash, ilg‘or texnologiyalar va investitsiyalarni jalb etish, innovatsion yechimlarni tatbiq qilish hamda o‘zaro manfaatli loyihalarni kengaytirish masalalari muhokama markazida bo‘ldi. Shuningdek, mavjud qo‘shma loyihalarning bugungi holati va istiqbollari atroflicha tahlil qilindi.

Uchrashuv avvalida Ibrohim Abdurahmonov O‘zbekiston-Yaponiya munosabatlari strategik ahamiyat kasb etayotganini ta’kidladi. U Yaponiya agrar tajribasini chuqur o‘rganish va amaliyotga joriy etish mamlakatimiz qishloq xo‘jaligini zamonaviy bosqichga olib chiqishda muhim omil bo‘lib xizmat qilishini qayd etdi.

O‘z navbatida, deputat Seki Yosixiro O‘zbekiston bilan hamkorlikni chuqurlashtirish va yangi loyihalarni amaliyotga tatbiq etish masalasi bugungi kunda dolzarb ahamiyat kasb etayotganini bildirdi. Xususan, u issiqxonachilikda innovatsion loyihalarni amalga oshirish, zamonaviy texnologiyalarni joriy etish orqali mavjud aloqalarni yanada mustahkamlash bo‘yicha o‘z takliflarini ilgari surdi.

Suhbat chog‘ida vazir Abdurahmonov agrar soha talabalari uchun yapon tilini o‘rganish imkoniyatlari yaratilganini, bu orqali talabalarni Yaponiyaga yuborish va u yerda amaliy ko‘nikmalarni egallash imkoniyatlari oshirilayotganini ma’lum qildi.

Shuningdek, uchrashuvda qishloq xo‘jaligi texnikasi ishlab chiqarish va bog‘dorchilik yo‘nalishida Yaponiyaning ilg‘or tajribasini O‘zbekistonga olib kirish bo‘yicha hamkorlikni yanada rivojlantirish zarurligi ta’kidlandi.

Uchrashuv yakunida tomonlar qishloq xo‘jaligining turli tarmoqlarida aniq loyihalarni ishlab chiqish va ularni bosqichma-bosqich amalga oshirish borasida kelishib oldilar. Bu esa O‘zbekiston va Yaponiya o‘rtasidagi agrar sohada o‘zaro manfaatli hamkorlikning yangi bosqichini boshlab beradi.