O‘zbekiston–Polsha: Hamkorlik aloqalari yangi bosqichga ko‘tariladi

Uchrashuv davomida ikki tomonlama hamkorlik aloqalarini mustahkamlash, qishloq xo‘jaligi yo‘nalishida yangi loyihalarni amaliyotga tatbiq etish masalalari atroflicha muhokama qilindi.

Xususan, tomonlar o‘rtasida qishloq xo‘jaligi bozorlarini tahlil qilish, resurslarni samarali boshqarish va ushbu yo‘nalishdagi ilg‘or tajribalarni o‘zaro almashish imkoniyatlari ko‘rib chiqildi.

Shuningdek, vazir o‘rinbosari Alisher Shukurov Polsha bilan talabalar almashinuvi yuqori darajada yo‘lga qo‘yilganini ta’kidladi. U ushbu sohadagi hamkorlikni yanada kengaytirish ikki tomon uchun manfaatli ekanini qayd etdi.

Tomonlar chorvachilik, kichik qishloq xo‘jaligi texnikalari va uskunalarini ishlab chiqarish, hamda ushbu sohada faoliyat yuritayotgan tadbirkorlarning O‘zbekistonda tashkil etiladigan xalqaro ko‘rgazmalarda ishtirokini ta’minlash masalalarida ham fikr almashdilar.

Shuningdek, meva-sabzavot mahsulotlarini import va eksport qilish sohasida hamkorlikni kuchaytirish, bog‘dorchilikda Polsha tajribasini joriy etish, shuningdek, polshalik agrar mutaxassislarni O‘zbekistonga jalb qilish masalalariga ham alohida e’tibor qaratildi.

Uchrashuv yakunida Alisher Shukurov Polsha delegatsiyasining taklif va tashabbuslarini mamnuniyat bilan tinglashga, konstruktiv muloqotni davom ettirishga va Qishloq xo‘jaligi vazirligi vakolatlari doirasida har tomonlama ko‘mak berishga tayyorligini bildirdi.