Xitoy ta’lim grantlari sonini oshirish imkoniyatlari muhokama qilindi

Unda tomonlar oliy ta’lim va ilm-fan sohasida ikki mamlakat o‘rtasidagi aloqalarni yanada kengaytirish, shuningdek, Xitoy OTMlarida o‘qish istagidagi O‘zbekiston yoshlariga ushbu xorijiy mamlakat ta’lim grantlarinini yanada ko‘paytirish yuzasidan fikr almashdilar.

“Xitoy Ta’lim vazirligi Stipendiyalar kengashining asosiy vazifalari sirasiga nafaqat xorijlik, jumladan o‘zbekistonlik talabalarga ta’lim grantlari ajratish, balki xitoylik talabalarning ham xorijda o‘qishini moliyaviy qo‘llab-quvvatlashdir. Xitoy yoshlari O‘zbekiston oliy ta’limining ilg‘or yutuqlaridan bahramand bo‘lishlaridan, turli almashinuv dasturlarida qatnashishlaridan manfaatdor bo‘lamiz.

Shundan kelib chiqib, xitoylik talabalarning O‘zbekiston oliy ta’limi muaasasalarida o‘qishlari uchun ham grant ajratish masalasini ishlab chiqmoqchimiz.

Bo‘lib o‘tgan “Xitoy universitetlari ko‘rgazmasi”da qatnashish uchun kelgan yetakchi xitoy OTMlari vakillarining O‘zbekistonga tashrifi ikki mamlakat OTMlari o‘rtasidagi aloqalarni yanada kengaytirishga ham xizmat qiladi.” – deydi Tyan Lulu xonim.

Bugunga kunda Xitoy OTMlarida tahsil olayotgan o‘zbekistonlik yoshlar soni yildan-yilga oshib bormoqda. Bundan tashqari, respublikamizda xitoy tilini o‘rganayotgan talabalar salmog‘i ortdi. Misol uchun, Xitoy tili respublikaning 5 ta oliygohi: Toshkent davlat sharqshunoslik universiteti, O‘zbekiston davlat jahon tillari universiteti, Samarqand davlat chet tillari instituti, Jahon iqtisodiyoti va diplomatiya universiteti hamda Toshkent davlat iqtisodiyot universitetida o‘rgatilmoqda. Umuman olganda, O‘zbekiston oliy o‘quv yurtlarida 2000 dan ortiq talaba Xitoy tilini o‘rganmoqda. 

Shuningdek, 2004-yildan beri Toshkentda, 2013-yildan buyon Samarqandda faoliyat yuritib kelayotgan Konfutsiy institutlarida yuzlab fuqarolarimiz Xitoy tilini o‘rganishmoqda.

Shuni inobatga olib, vazir o‘rinbosari Sh. Turdikulova keyingi o‘quv yillarida o‘zbekistonlik abiturientlarga Xitoyda o‘qish uchun ta’lim grantlarini sonini yanada ko‘paytirish imkoniyatini o‘rganib chiqishni taklif qildi.
“Respublikamiz ijtimoiy-iqtisodiy rivojlanishining hozirgi bosqichidagi ehtiyojini inobatga olib, magistratura va doktorantura (PhD) bosqichida ta’lim olish imkoniyatlarini ko‘paytirish biz uchun ayniqsa, muhimdir”, dedi vazir o‘rinbosari.

Xitoy tomoni ushbu murojaatni ijobiy ko‘rib chiqishga tayyorligini ma’lum qildi.