Al-Quvaytda bo‘lib o‘tgan forum hamkorlikning yangi yo‘nalishlarini belgilab berdi

Tadbirda ikki davlatning tegishli vazirlik va idoralari, tarmoq birlashmalari rahbarlari hamda 100 dan ko‘proq yirik kompaniya va moliya institutlari rahbarlari ishtirok etdi.

Forumda delegatsiyalarga O‘zbekiston tomonidan – O‘zbekiston Respublikasi investitsiyalar, sanoat va savdo vaziri Laziz Kudratov, Quvayt tomonidan – Quvayt Savdo-sanoat palatasi rahbari Rabah al-Rabah boshchilik qildi.

Forumning ochilish marosimida qutlov so‘zi bilan so‘zga chiqqan Laziz Kudratov so‘nggi yillarda O‘zbekiston bilan Quvayt o‘rtasidagi munosabatlar izchil rivojlanib borayotganini alohida ta’kidladi. Yirik quvaytlik kompaniyalar O‘zbekistonda sog‘liqni saqlash, qishloq xo‘jaligi, infratuzilma, mehmonxona biznesi, farmatsevtika va ko‘chmas mulk sohalarida loyihalarni muvaffaqiyatli amalga oshirmoqda.

Mamlakatimizda xorijiy investorlar uchun eng qulay sharoitlar yaratilganligi ta’kidlandi. Xususan, imtiyozlar va preferensiyalar joriy etildi, tadbirkorlar duch kelayotgan to‘siqlar olib tashlanmoqda, xususiylashtirish dasturi amalga oshirilmoqda, infratuzilmasi rivojlangan o‘nlab EIZlar tashkil qilindi, MDH va Yevropa Ittifoqi bozorlariga bojsiz kirish ta’minlandi.

Natijada so‘nggi yillarda O‘zbekiston iqtisodiyoti qariyb ikki baravar oshdi. Birgina 2024-yilda YaIM 6,5 foizga o‘sib, 115 milliard dollarga yetdi. Xorijiy investitsiyalar hajmi 1,6 barobar ko‘payib, 34,9 milliard dollarni tashkil etdi.

“O‘zbekiston – 2030” strategiyasi amalga oshirilmoqda. Uning doirasidagi vazifalar keng ko‘lamli islohotlar bilan birgalikda 2030-yilga borib O‘zbekiston yalpi ichki mahsulotini 200 milliard dollarga yetkazish, daromadi o‘rtachadan yuqori bo‘lgan, yiliga 110 milliard dollar to‘g‘ridan-to‘g‘ri xorijiy investitsiyalar va 45 milliard dollarlik eksportga ega mamlakat maqomiga erishish imkonini beradi.

Shu bilan birga, ikki davlat oʻrtasidagi savdo-iqtisodiy, sarmoyaviy va sanoat sohasidagi hamkorlikni chuqurlashtirish boʻyicha foydalanilmayotgan ulkan salohiyatga eʼtibor qaratildi.

Shu o‘rinda, agrosanoat tarmog‘i, to‘qimachilik sanoati, tog‘-kon sanoati, energetika va neft-kimyo, sog‘liqni saqlash va farmatsevtika, xususiylashtirish, logistika, aloqa va turizm kabi hamkorlikni yanada rivojlantirishning ustuvor yo‘nalishlari sanab o‘tildi.

Oʻz navbatida, Quvayt Savdo-sanoat palatasi rahbari Rabah al-Rabah Oʻzbekistonning ikki tomonlama savdo-iqtisodiy va sarmoyaviy hamkorlikni rivojlantirish uchun shart-sharoitlar yaratish borasidagi saʼy-harakatlarini yuqori baholadi hamda Quvayt va Oʻzbekiston tadbirkorlarini hamkorlikni chuqurlashtirishga chaqirdi, ularni tomonlarning yangi loyihalar va tashabbuslarni qoʻllab-quvvatlashga oʻzaro tayyor ekaniga ishontirdi.

Biznes-forum doirasida “B2B” va “G2B” muzokaralari va milliy mahsulotlar ko'rgazmasi tashkil etildi. Tadbirkorlar yangi aloqalarni o'rnatish, qo'shma loyihalarning muhim jihatlari va tovarlarni o'zaro yetkazib berish masalalarini muhokama qilish imkoniga ega bo'ldi.

Shuningdek, forum doirasida milliy mahsulotlari ko‘rgazmasi tashkil etilib, unda tadbirkorlar tashqi bozorda talab yuqori bo‘lgan mahsulotlarni namoyish etdi.

Tadbir yakunlari bo‘yicha qator investitsiyaviy bitimlar va savdo shartnomalari imzolandi.  Biznes doiralari vakillariga ko'ra, imzolangan hujjatlar qisqa vaqt ichida O‘zbekiston-Quvayt aloqalarini sezilarli darajada kengaytirish va ikki davlat o‘rtasidagi tovar ayirboshlash hajmini oshirish imkonini beradi.