“Barqaror taraqqiyot: inklyuziv ta’lim va xotin-qizlar tashabbuslari” Bugun ayni mavzuda V xalqaro forum bo‘lib o‘tdi.

Ma’lumki, inklyuziv ta’limning maqsadi – alohida ta’lim ehtiyojlari bo‘lgan o‘quvchilar uchun maktabda maxsus vosita va metodlarni qo‘llash orqali maxsus pedagoglarni jalb etgan holda to‘siqsiz moslashtirilgan ta’lim muhitini yaratish, ularning jamiyatga samarali moslashuvi hamda to‘laqonli uyg‘unlashuviga xizmat qiladigan sifatli umumiy o‘rta ta’lim berishni ta’minlashdir.

Mamlakatimiz oliy ta’lim tashkilotlarida inklyuziv ta’limni joriy qilish, nogironligi bo‘lgan shaxslar uchun zaruriy sharoitlarni va to‘siqsiz muhitni yaratish masalasiga alohida e’tibor qaratilmoqda. Yangi O‘zbekistonning taraqqiyot strategiyasida «Nogironligi bo‘lgan shaxslarning jamiyat ijtimoiy-iqtisodiy hayotiga jalb qilinishi va faol ishtirokini ta’minlovchi inklyuziv ta’lim va ishga joylashtirish tizimini takomillashtirish» kabi vazifalar belgilangan

2025-yilga borib O‘zbekiston maktablarning kamida 51 foizi inklyuzivlikka erishishni maqsad qilib qo‘ygan. Ushbu maqsadlar uchun 3 yil davomida 600 million AQSH dollaridan ortiq mablag‘ jalb etilishi rejalashtirilgan.
2020–2025-yillarda inklyuziv ta’limni rivojlantirish konsepsiyasi amalga oshirilmoqda. Masalan, 2022 o‘quv yilida O‘zbekistonning barcha viloyatlaridagi 225 ta umumta’lim maktabi imkoniyati cheklangan bolalar uchun o‘z eshiklarini  ochdi.  2024-yilga kelib 417 ta maktablarda inklyuziv sinflar tashkil etilib, ularga 734 nafar o‘quvchilar qamrab olindi.

Ma’ruzada alohida ta’kidlanganidek: O‘zbekistonda izchil amalga oshirib kelinayotgan yoshlarga oid davlat siyosati doirasida qizlarimizning jamiyatdagi ijtimoiy-siyosiy faolligini oshirish, qizlar o‘rtasida hamkorlik va tashabbuskorlik muhitini yaratish borasidagi sa’y-harakatlarni yanada kuchaytirish; olima ayollar safini kengaytirish, jamiyat ravnaqi uchun munosib ilmiy izlanishlarni qo‘llab-quvvatlashga ustuvor ahamiyat qaratilmoqda. Shuning barobarida vatanimizni yanada ravnaq toptirishda, yangi ixtirolarning ko‘payishida yoshlar tashabbuskor bo‘lishlari; mamlakatimizda oliy ma’lumotli xotin-qizlar safini oshirish, qizlarning ta’lim-tarbiya olishlari, kasb-hunar egallashlari, ijtimoiy himoyalash borasidagi islohotlar ijrosida yoshlar yordamchi kuchlarga aylanishlari;  yurtimiz qizlarining  izlanuvchan, bilimli, baxtli qizlar, onalar bo‘lib kamolga yetishi uchun birlashib, hamjihat bo‘lib harakat qilish maqsadga muvofiqdir.