Oliy ta’lim, fan va innovatsiyalar vaziri xalqaro maslahatchilar kengashi delegatsiyasi bilan uchrashdi

Dastlab, vazir Yevropaning yetakchi oliy ta’lim muassasalari tajribasi, shuningdek, kredit-modul tizimini O’zbekiston oliy ta’lim sohasiga joriy etish va ta’lim-ishlab chiqarish o‘rtasidagi integratsiyani ta’minlashda ko‘rsatgan yordami uchun xalqaro maslahatchilar Alfred Guzenbauer, Aleksandr Kvasnevskiy va Shtefan Fyulelarga minnatdorlik bildirdi.

Uchrashuv davomida 2025-2026 o‘quv yilidan Germaniyaning “Anhalt” universiteti tomonidan O‘zbekistonda uchta yangi bakalavriat dasturini joriy etish, Erasmus+ dasturi doirasida professor-o‘qituvchilar va olimlar uchun seminar-treninglar tashkil etish, Toshkent, Nukus va Navoiy shaharlarida Yevropa universitetlari bilan hamkorlik bo‘yicha forumlar o‘tkazish masalalarini muhokama qildilar.

Shuningdek, kelgusida Yevropa universitetlari bilan qo‘shma ta’lim dasturlarini kengaytirish, ilmiy hamkorlik va akademik almashinuvlarni rivojlantirish, talabalar va professor-o‘qituvchilar uchun malaka oshirish hamda tadqiqot loyihalarini kengaytirish masalalari ko‘rib chiqildi.

Anjuman yakunida uzluksiz kasbiy rivojlanish va ta’lim dasturlarini qo‘llab-quvvatlash bo‘yicha ishlarni yanada jadallashtirish yuzasidan fikr almashildi.