Unda ushbu mamlakatning O‘zbekistondagi Favqulodda va muxtor elchisi Leonid Marinich, Belarus Respublikasi Milliy Kengashi Vakillar palatasining xorijdagi belaruslar ishlari bo‘yicha Parlament guruhi rahbari Valentina Rajanets, mazkur palataning Sport, sog‘liqni saqlash, madaniyat, oila va yoshlar masalalari bo‘yicha Parlament komissiyasi raisi, professor Lyudmila Makarina-Kibak ishtirok etdi.

Muloqot avvalida mehmonlarga keyingi yillarda davlatimiz rahbari tashabbusi bilan sog‘liqni saqlash sohasida amalga oshirilayotgan keng ko‘lamli islohotlar haqida ma’lumot berildi.

O‘z navbatida, Belarus delegatsiyasi vakillari o‘z mamlakatida ona va bola salomatligini muhofaza qilish bo‘yicha erishilgan yutuqlar xususida so‘zlab berdi.

Ma’lumki, Belarus onalar va go‘daklar o‘limi ko‘rsatkichi eng past davlatlardan biri. Bu yerda onalik va bolalikni muhofaza qilish bo‘yicha takomillashgan me’yoriy-huquqiy baza shakllangan, kadrlarni tayyorlash bo‘yicha samarali tizim yaratilgan.

Shundan kelib chiqib, uchrashuvda Qashqadaryoda barpo etilgan Ona va bola salomatligi tibbiyot markazi faoliyatiga Belarus boshqaruv tizimini joriy etish masalasi ko‘rib chiqildi. Buning uchun Belarus Ona va bola salomatligi ilmiy-amaliy markazining mutaxassislarini jalb qilishga kelishib olindi.

Shuningdek, mehmonlar bu sohadagi qonunchilikni takomillashtirish, shu jumladan O‘zbekiston sog‘liqni saqlash kodeksini ishlab chiqishda yaqindan yordam berishga tayyorligini bildirdi.

Kun tartibidan o‘rin olgan yana bir masala – birlamchi bo‘g‘inda mehnat qilayotgan akusherlarni Belarus ta’lim standartlari asosida o‘qitish bo‘ldi. Bu borada erishilgan kelishuvga ko‘ra, dastlabki bosqichda Qashqadaryo viloyatida birlamchi ambulator tizimda faoliyat yuritayotgan 900 nafar doya xalqaro protokollar asosida milliy maqsadlar va demografik vaziyatni hisobga olgan holda o‘qitiladi.

Yakuniy imtihon chet ellik ekspertlar tomonidan qabul qilinib, undan muvaffaqqiyatli o‘tganlar xalqaro sertifikatga ega bo‘ladi.

Muloqot davomida shu yil 13-24-noyabr kunlari mamlakatimizda o‘tkazilishi rejalashtirilgan Belarus tibbiyoti kunlariga tayyorgarlik ko‘rish masalasi ham muhokama qilindi.

Mazkur aksiya doirasida do‘st mamlakatdan yurtimizga bolalar onkogematologiyasi, kardiologiya, onkologiya, neonatologiya kabi yo‘nalishlar bo‘yicha yetakchi mutaxassislar, olimlar tashrif buyurishi rejalashtirilgan. Ular ishtirokida hududlarda yuqori texnologik jarrohlik amaliyotlari, mahorat darslari, konsilium va seminarlar tashkil etiladi.

Qolaversa, ana shu aksiyaning mantiqiy davomi sifatida noyabr oyi yakunida Minsk shahrida O‘zbekiston – Belarus tibbiyot forumi o‘tkaziladi. Ikki davlat o‘rtasidagi tibbiy hamkorlikni mutlaqo yangi bosqichga ko‘tarishga xizmat qiladigan ushbu nufuzli tadbirga yurtimizdagi hududiy sog‘liqni saqlash boshqarmalari, ixtisoslashtirilgan tibbiyot markazlari rahbarlari tashrif buyurishi kutilmoqda.

O‘zaro hamkorlik aloqalarini tuman darajasida rivojlantirish maqsadida forumda tuman tibbiyot birlashmalari mas’ullari, shuningdek tibbiyot texnikumlari va tibbiy oliygohlar rahbarlari ham ishtirok etadi.

Tadbir yakunida o‘zaro manfaatli qator memorandum va kelishuvlar imzolanishi ko‘zda tutilgan.