O‘zbekistonning “yashil” o‘sish yo‘lidagi taraqqiyotini monitoring qilish” hisobotining taqdimoti bo‘lib o‘tdi

Tadbir Iqtisodiy hamkorlik va taraqqiyot tashkiloti (OECD), Toshkent shahridagi Xalqaro Vestminster universiteti (WIUT), Makroiqtisodiy va mintaqaviy tadqiqotlar instituti qoshidagi “yashil” xab ko‘magida tashkil etildi. Unda Fransiya taraqqiyot agentligi, Germaniya xalqaro hamkorlik agentligi, Jahon banki, “Chapter Zero” iqlim o‘zgarishi tashabbusi, “Alkes Research” ilmiy-tadqiqot kompaniyasi vakillari, shuningdek, Ekologiya, atrof-muhitni muhofaza qilish va iqlim o‘zgarishi vazirligi, Statistika agentligi vakillari, xususiy sektor va fuqarolik jamiyatining boshqa institutlari vakillari ishtirok etdi.

Dastlab, Iqtisodiyot va moliya vazirligining “Yashil” iqtisodiyotni rivojlantirish departamenti direktori kirish so‘zi bilan chiqib, o‘z fikrlarini bildirib o‘tdi. Shundan so‘ng OECD’ning atrof-muhit bo‘yicha direktor o‘rinbosari, doktor Matilda Mesnard va WIUT rektori doktor Bahrom Mirkasimov hisobot bo‘yicha ma’lumot berib o‘tishdi.

Tadbirda, shuningdek, O‘zbekistonning “yashil” transformatsiyasining hozirgi holati to‘g‘risida asosiy ma’lumotlar taqdim etildi.

Aytish lozimki, hisobotda birinchi marta “yashil” o‘sishning barcha asosiy sohalarida O‘zbekiston natijalarini kuzatish uchun O‘zbekiston uchun “yashil” o‘sish ko‘rsatkichlari tizimi qo‘llanmoqda.

Tadbir davomida WIUT’ning katta ilmiy rahbari, doktor Etenesh Asfau OECD’ning “yashil” o‘sish ko‘rsatkichlari haqida keng tushunchalar  berib, O‘zbekistonning “yashil” iqtisodiyot yo‘lidagi taraqqiyotini ochib berdi.

Taqdimot davomida quyidagi masalalar ko‘rib chiqildi:

· O‘zbekiston tabiiy resurslar va ekologik xizmatlardan foydalanishda samaradorlikka erishmoqdami?

· O‘zbekiston iqtisodiyotining tabiiy aktivlari bazasi qo‘llab-quvvatlanadimi?

· O‘zbekistonda iqtisodiy o‘sishni yashillashtirish odamlarning hayot sifatini yaxshilashga yordam beradimi?

· “Yashil” o‘sish O‘zbekistonda iqtisodiy imkoniyatlarni qanday yaratmoqda?

Buning barchasi Iqtisodiyot va moliya vazirligi, Statistika agentligi, Toshkent shahridagi Xalqaro Vestminster universiteti va OECD o‘rtasidagi yaqin hamkorlik samarasidir.

Taqdimot yakunida ishtirokchilar o‘rtasida panel muhokamasi bo‘lib o‘tdi. Tomonlar O‘zbekistonda “yashil” iqtisodiyotni monitoring qilish tizimini ilgari surish muammolari va yo‘llarini ishlab chiqish bo‘yicha asosiy xulosalar qildilar.

Ma’lumot uchun: O‘zbekiston Respublikasi Prezidentining 2022-yil 2-dekabrdagi PQ-436-son Farmoni bilan “yashil” iqtisodiyotga o‘tish bo‘yicha dastur va harakatlar rejasi tasdiqlandi, shu bilan birga, taraqqiyotni monitoring qilish uchun sakkizta asosiy va maqsadli ko‘rsatkich tasdiqlandi. Iqtisodiyot va moliya vazirligiga “yashil” iqtisodiyot strategiyasini amalga oshirish va monitoring qilish vazifasi yuklandi.

Shu munosabat bilan “OECD “yashil” o‘sish ko‘rsatkichlari tizimidan foydalangan holda O‘zbekistonning “yashil” o‘sish yo‘lidagi taraqqiyotini monitoring qilish: 2023-yildagi holat” hisoboti Vazirlikning “yashil” iqtisodiyotni monitoring qilish borasidagi sa’y-harakatlarining asosiy tarkibiy qismidir.