O'zbekiston - Hindiston: Hamkorlik aloqalari yangi bosqichga qadam qo'ymoqda

Uchrashuvda ikki tomonlama hamkorlik aloqalarini yanada rivojlantirish masalalari muhokama etildi.

Ma'lumot o'rnida, "Tillotoma Foundation" tashkiloti xalqaro munosabatlar, diplomatiya, hududiy tadqiqotlar, gender, moliyaviy, ekologik, ilmiy, strategik va mudofaa siyosati sohalarida faoliyat yurituvchi global tahlil markazidir. Tashkilot o'zining ixtisoslashgan tajribasidan foydalangan holda strategik xalqaro maslahat beradi. Bundan tashqari, diplomatiya, xalqaro munosabatlar, geosiyosat, xorijiy tillar, tarix va madaniyat kabi turli sohalar bo'yicha akademik dasturlarni amalga oshiradi.

Uchrashuv davomida O‘zbekiston va Hindiston o‘rtasidagi munosabatlarning bugungi holati haqida fikr bildirildi, tomonlarning qishloq xo'jaligi sohasida o‘zaro tajriba almashishi va hamkorlikni rivojlantirishi borasida ulkan imkoniyatlar mavjudligi ta'kidlab o'tildi.

Muloqot davomida Oʻzbekiston va Hindiston oʻrtasida fermerlikning innovatsion usullarini ishlab chiqish va joriy etish boʻyicha hamkorlik aloqalarini o'rnatish, qishloq xo‘jaligi sohasidagi ilg‘or tajriba almashish amaliyotini yo'lga qo'yish, urug'chilik sohasida hamkorlik qilish, yerning holatini o'rganish va tadqiqotlar olib borish borasida yangicha, innovatsion texnologiyalarni joriy etish masalalari muhokama etildi.

Bundan tashqari, uchrashuvda bir qancha takliflar ilgari surildi.

Bular:

- O‘zbekiston va Hindiston o‘rtasidagi mahsulotlarning eksport-importini kuchaytirish maqsadida O‘zbekistonning yuqori sifatli paxta, meva-sabzavotlari va Hindistonning maxsus ekinlarini o‘zaro almashuvini yo‘lga qo‘yish;

- Qishloq xo‘jaligi texnologiyalari sohasida Hindistonning zamonaviy qishloq xo‘jaligi texnologiyalarini O‘zbekistonga olib kelish, masalan, irrigatsiya tizimlari, agronomik tadqiqotlar va o‘simliklarni muhofaza qilish usullari tashkil etish imkoniyatlari o‘rganib chiqish.

Uchrashuv yakunida qishloq xo'jaligi vaziri Ibrohim Abdurahmonov ikki tomonlama hamkorlik aloqalarini rivojlantirish bugungi kunda har qachongidan ham muhim ekanligini hamda bu masalada hamkorlikka tayyor ekanligini ma'lum qildi.