O‘zbekiston va Rossiya hududlari kengashining III yalpi majlisi bo‘lib o‘tdi

Unda Rossiyaning 17 ta hududi rahbarlari va vakillari, O‘zbekistonning barcha hududlari vakillari, shuningdek, ikki mamlakatdan 400 ga yaqin tadbirkor ishtirok etdi.

O‘zbekiston Respublikasi Prezidenti Shavkat Mirziyoyev va Rossiya Federatsiyasi Prezidenti Vladimir Putinning qutlov so‘zlarini Bosh vazir o‘rinbosari Jamshid Xodjayev hamda Rossiya Federatsiyasi Hukumati Raisining birinchi o‘rinbosari Denis Manturov o‘qib eshittirdi.

Ikki mamlakat delegatsiyalarining nufuzli tarkibi to‘g‘ridan-to‘g‘ri hududlararo aloqalar va sanoat kooperatsiyasini kengaytirishdan tortib, savdo, investitsiyalar va qo‘shma loyihalargacha bo‘lgan keng ko‘lamli masalalarni muhokama qilish imkonini berdi.

Tadbirning amaliy yakuni sifatida 4 ta bitim imzolandi. Ular Farg‘ona va Omsk viloyatlari, Surxondaryo viloyati va Krasnoyarsk o‘lkasi, Namangan viloyati va Dog‘iston Respublikasi o‘rtasidagi hamkorlikni, shuningdek, Investitsiyalar, sanoat va savdo vazirligi hamda Wildberries o‘rtasida «A» toifasidagi logistika majmuasini qurish bo‘yicha investitsiya bitimini qamrab oladi.

Hududlar kengashining navbatdagi yig‘ilishi Omsk shahrida bo‘lib o‘tadi.