O‘zbekiston–Turkiya: agrar hamkorlikning yangi yo‘nalishlari muhokama qilindi

Muloqot davomida ikki davlat o‘rtasida qishloq xo‘jaligi sohasida yo‘lga qo‘yilgan hamkorlikning bugungi holati, mavjud imkoniyatlar va istiqbolda amalga oshirilishi rejalashtirilayotgan qo‘shma loyihalar atroflicha muhokama qilindi.

Uchrashuvda agrar hamkorlikni yanada mustahkamlash, xususan, ikki davlat o‘rtasidagi agrohamkorlikni rivojlantirish bo‘yicha ishchi guruhning navbatdagi yig‘ilishini tashkil etish masalasiga alohida e’tibor qaratildi.

Bundan tashqari, chorvachilik va ozuqa bazasini rivojlantirish, urug‘chilik sohasida hamkorlikni kengaytirish, qurg‘oqchilikka chidamli ekin navlarini yaratish kabi dolzarb yo‘nalishlar ko‘rib chiqildi.

Qishloq xo‘jaligi mahsulotlarining o‘zaro eksporti va importi bilan shug‘ullanuvchi tadbirkorlar sonini ko‘paytirish, baliqchilikni rivojlantirish hamda ilm-fan sohasidagi aloqalarni mustahkamlash masalalari yuzasidan ham fikr almashildi.

Shuningdek, Turkiya Respublikasi qishloq va o‘rmon xo‘jaligi vaziri Ibrohim Yumakli boshchiligidagi delegatsiya Ibrohim Abdurahmonov hamrohligida Toshkent davlat agrar universitetiga tashrif buyurib, talabalar uchun yaratilgan ta’lim olish sharoitlari, zamonaviy infratuzilma hamda yosh mutaxassislarni tayyorlash borasida amalga oshirilayotgan ishlar bilan tanishdi.