“Siemens Healthineers” kompaniyasi yurtimizdagi davolash-profilaktika muassasalariga eng ilg‘or tibbiyot uskunalarini yetkazib beradi

Anjumanda ko‘plab nemis korxona, klinika va tibbiyot oliy o‘quv yurtlari qatorida dunyoga mashhur “Siemens Healthineers” kompaniyasi bilan ham mamlakatimiz shifoxonalariga zarur tibbiy asbob-uskunalar yetkazib berish bo‘yicha dastlabki kelishuvga erishilgan edi. 

Oradan qisqa vaqt o‘tib, ana shu kelishuv ijrosi yuzasidan muloqot boshlandi: Sog‘liqni saqlash vaziri Amrillo Inoyatov ushbu kompaniyaning vitse-prezidenti Bernt Biber boshchiligidagi delegatsiya vakillari bilan uchrashuv o‘tkazdi. 

Taʼkidlash joizki, 125-yildan ziyod tajribaga ega “Siemens Healthineers” kompaniyasi tibbiyot sohasida raqamli texnologiyalarni joriy etish va tibbiy asbob-uskunalarni yetkazib berish bo‘yicha dunyoda yetakchilardan hisoblanadi. 

Vazir muloqotda qayd etganidek, bugun O‘zbekiston sog‘liqni saqlash tizimi to‘liq transformatsiya qilinmoqda. Bu jarayonda yurtimizdagi davlat davolash-profilaktika muassasalari qatori, 8 mingdan ziyod xususiy shifoxonalarni zamonaviy tibbiy asbob-uskunalar bilan jihozlash, soha uchun malakali mutaxassislar tayyorlash va bu orqali aholiga tibbiy xizmat ko‘rsatish sifatini oshirish ustuvor yo‘nalishlar sifatida belgilangan.

Shuningdek, uchrashuvda O‘zbekistonni Markaziy Osiyodagi tibbiyot va tibbiy taʼlim xabiga aylantirish uchun yetarlicha imkoniyat va salohiyat mavjudligi taʼkidlandi. 

O‘z navbatida, germaniyalik mehmonlar o‘zbek tibbiyoti jadal surʼatlarda taraqqiy etayotganini eʼtirof etib, Sog‘liqni saqlash vazirligi bilan uzoq muddatli hamkorlik qilishga tayyor ekanligini maʼlum qildi.

Muloqot davomida mamlakatimizdagi davlat va xususiy tibbiyot muassasalariga zarur tibbiy asbob-uskunalarni yetkazib berish, ularga xizmat ko‘rsatishga mo‘ljallangan servis-markazlar tashkil etish va mutaxassislar tayyorlash, sohaga eng so‘nggi rusumdagi innovatsion texnologiyalarni joriy etishga kelishib olindi. 

Yakunda Sog‘liqni saqlash vazirligi va “Siemens Healthineers” kompaniyasi o‘rtasida memorandum imzolandi.