Vazir Sh.Xamraev mehmonlarni tashrif bilan qutladi.

- Hindiston bilan O‘zbekiston azaldan do‘st bo‘lib kelgan. Biz bu mamlakat bilan suv xo‘jaligi sohasida hamkorlikdan manfaatdormiz, - dedi vazir.

O‘zbekistonda Davlat rahbarining tashabbusi bilan suv xo‘jaligi sohasida olib borilayotgan islohotlar, suvni boshqarish, kanallarni betonlashtirish, tejamkor texnologiyalarni joriy etish bo‘yicha amalga oshirilayotgan ishlar haqida to‘xtalib o‘tildi.

“WAPCOS Limited” kompaniyasi Hindistonning Suv va energetika vazirligi tasarrufidagi davlat korxonasi bo‘lib, suv resurslari, energetika, infratuzilmani rivojlantirish sohasida muhandislik xizmatlarini taqdim etish bo‘yicha jahonda yetakchilardan biri hisoblanadi. Ellik yildan oshiq tajribaga ega kompaniya dunyoning 75 dan ortiq davlatida ko‘plab loyihalarni amalga oshirgan.

- Butun dunyoda suvga talab ortib borayapti. Kelajakda suv tanqisligini yumshatish uchun boshqa davlatlar bilan hamkorlik qilish, o‘z tajribalarimizni baham ko‘rishni rejalashtirganmiz. Shu maqsadda O‘zbekistonga keldik. O‘zbekiston va Hindiston suv xo‘jaligining o‘xshash tomonlari ko‘p. Masalan, bizda ham suv resurslarining katta qismi qishloq xo‘jaligida ishlatiladi. Kanallar, suv omborlari qurish, suv infratuzilmasini rivojlantirish bo‘yicha hamkorlik qilish niyatlarimiz bor, - deydi  janob R.K.Agraval.

Uchrashuvda ikki tomonlama hamkorlik dasturlarini yo‘lga qo‘yish, xorijiy hukumat va moliya institutlarining grant mablag‘larini jalb etish, O‘zbekistonda chet el investitsiyalari ishtirokidagi loyihalarning tenderlarida qatnashish masalalari muhokama qilindi.