Germaniyaning yetakchi logistika kompaniyasi bilan hamkorlik istiqbollari muhokama qilindi

Uchrashuvda transport-logistika sohasida o‘zaro hamkorlikni rivojlantirish, zamonaviy logistika xizmatlarini joriy etish, shuningdek, Surxondaryo viloyatining tranzit salohiyati va eksport imkoniyatlaridan samarali foydalanish masalalari muhokama qilindi.

Tashrif doirasida kompaniya vakillari viloyatdagi ayrim infratuzilma obyektlari bilan tanishib, soha mutaxassislari bilan suhbatlar o‘tkazdi. Uchrashuvlar davomida hududning logistika imkoniyatlari, mavjud salohiyat va istiqbolli yo‘nalishlar yuzasidan fikr almashildi.

Muloqot chog‘ida xalqaro yuk tashish, ombor va kontrakt logistikasi, elektron tijorat logistikasi, sanoat korxonalari uchun kompleks logistik yechimlar, shuningdek, yuqori texnologiyalar sohalaridagi ehtiyojlar uchun zamonaviy xizmatlarni yo‘lga qo‘yish imkoniyatlari ko‘rib chiqildi.

Surxondaryo viloyatida logistika infratuzilmasini rivojlantirish, xalqaro transport yo‘laklariga integratsiyalashuv imkoniyatlarini o‘rganish va istiqboldagi hamkorlik yo‘nalishlarini belgilab olish bo‘yicha muloqotlarni davom ettirish muhimligini ta’kidlandi.

Uchrashuv yakunida "Rhenus Logistics" kompaniyasi vakili viloyat rahbarini kompaniyaning faoliyati, logistika markazlari va sohadagi ilg‘or tajribalari bilan yaqindan tanishish maqsadida Germaniyaga taklif qildi.