Oilalar mustahkamligiga salbiy ta’sir qiluvchi omillarni barvaqt aniqlash va bartaraf etish bo‘yicha hamkorlik yangi bosqichga ko‘tariladi

Yig‘ilishdan ko‘zlangan asosiy maqsad — O‘zbekiston Respublikasi Vazirlar Mahkamasining 2026 yil 19 maydagi "Yoshlarni oilaviy hayotga tayyorlash tizimini yanada takomillashtirish hamda oilaviy maslahat xizmatlarini tashkil etish chora-tadbirlari to‘g‘risida"gi 257-sonli qarori ijrosini ta’minlash bo‘yicha idoralararo samarali hamkorlikni yo‘lga qo‘yishdan iborat.

Mazkur qaror "Oila va xotin-qizlar maskanlari"ni mamlakatimizning barcha hududlarida to‘laqonli va izchil faoliyat yurituvchi yagona tizimga aylantirish, ularda ko‘rsatiladigan xizmatlar sifati va qamrovini tubdan oshirishga qaratilgan. Yig‘ilishda har bir vazirlik va idora oldiga aniq muddatlar bilan vazifalar qo‘yildi hamda ularning ijro mexanizmlari kelishib olindi.

Belgilangan vazifalar doirasida 2026 yil 10 iyungacha manfaatdor vazirlik va idoralar ishtirokida Maskanlar faoliyatini tashkil etish bo‘yicha Qo‘shma qaror loyihasi tayyorlanadi va tasdiqlanadi. Shuningdek, namunali dasturlar, algoritmlar, yo‘riqnomalar hamda yagona targ‘ibot-uslubiy materiallar — bukletlar va raqamli infografikalar ishlab chiqilib, barcha maskanlarga yetkaziladi.

Adliya vazirligi bilan hamkorlikda maskanlarda huquqiy va psixologik xizmatlar ko‘rsatish uchun mutaxassislarni jalb etishga doir namunaviy fuqarolik-huquqiy shartnoma loyihasi tayyorlanadi.

Bosqichma-bosqich barcha hududlarda mas’ul tashkilotlar va jamoatchilik vakillari ishtirokida namunaviy o‘quv seminarlari o‘tkaziladi. Mazkur seminarlarda maskanlar tizimini samarali yo‘lga qo‘yish bo‘yicha amaliy tavsiyalar ishlab chiqiladi va ularning bajarilishi qat’iy nazoratga olinadi.

Maskanlar faoliyati samaradorligini baholash maqsadida yagona elektron reyting tizimi joriy etiladi. Har oy yakuni bo‘yicha KPI (KPI) natijalari umumlashtiriladi, chorak va yil yakunida esa tahliliy ma’lumotlar tayyorlanib, tegishli rahbarlarga taqdim etib boriladi.

Yig‘ilish yakunida Vazirlar Mahkamasining ushbu qarori ijrosini belgilangan muddatlarda, sifatli va to‘liq hajmda ta’minlash barcha mas’ul idoralar uchun ustuvor vazifa ekani alohida ta’kidlandi. Oila va xotin-qizlar maskanlari davlatimizning oila institutini mustahkamlash hamda xotin-qizlarni har tomonlama qo‘llab-quvvatlash siyosatini bevosita amaliyotga tatbiq etuvchi asosiy mexanizm sifatida doimiy ravishda takomillashtirib boriladi.