O‘zbekiston va Germaniya: oliy ta’lim, til sertifikatlash va kadrlar tayyorlash bo‘yicha yangi maqsadlar belgilandi

Unda ikki davlat o‘rtasida ta’lim, til sertifikatlash, kasbiy tayyorgarlik va malakali kadrlar tayyorlash yo‘nalishlaridagi hamkorlik istiqbollari muhokama qilindi.

Ta’kidlanganidek, bugungi kunda O‘zbekistonning 40 dan ortiq oliy ta’lim muassasalari Germaniyaning 55 dan ziyod universitet va ilmiy-ta’lim tashkilotlari bilan 110 dan ortiq hamkorlik shartnomalari va memorandumlari asosida samarali aloqalarni yo‘lga qo‘ygan.

Uchrashuvda O‘zbekistonda nemis tilini o‘rganishga qiziqish ortib borayotgani ham alohida qayd etildi. Ayni paytda 23 ta oliy ta’lim muassasasida 2300 nafardan ziyod talaba nemis tilini asosiy til sifatida o‘rganmoqda. Shuningdek, 10 mingdan ortiq talabalar nemis tilini ikkinchi til sifatida o‘zlashtirmoqda.

So‘nggi 4 yilda Germaniyadan 300 ga yaqin professor-o‘qituvchi va 30 dan ortiq delegatsiya O‘zbekiston oliy ta’lim muassasalariga tashrif buyurgan bo‘lsa, mamlakatimiz oliy ta’lim muassasalari rahbarlari va professor-o‘qituvchilaridan 250 dan ziyod vakil Germaniyada bo‘lib qaytdi.

Muloqot chog‘ida til sertifikatlash tizimi, kasbiy ta’lim va xalqaro imtihonlarni tashkil etish sohasidagi hamkorlik masalalariga ham alohida to‘xtalib o‘tildi.

Tomonlar O‘zbekiston va Germaniya o‘rtasidagi sheriklik munosabatlarini yanada rivojlantirish, ta’lim va ilmiy almashinuvlarni kengaytirish hamda qo‘shma tashabbuslarni amalga oshirishga tayyor ekanliklarini bildirdilar.