Toshkentda O‘zbekiston Respublikasi Prezidenti huzuridagi Xorijiy investorlar kengashining oraliq majlisi bo‘lib o‘tdi

Ushbu kengash Hukumat hamda mamlakatimizda faoliyat yuritayotgan yirik xalqaro investorlar o‘rtasida to‘g‘ridan-to‘g‘ri muloqotni ta’minlovchi asosiy institutsional maydon hisoblanadi. Mazkur sessiya joriy yilning 18-iyun kuni bo‘lib o‘tishi rejalashtirilgan Kengashning IV yalpi majlisi oldidan tomonlarning qarashlari va pozitsiyalarini o‘zaro muvofiqlashtirib olishga xizmat qildi.

Majlis O‘zbekiston Respublikasi Bosh vazirining o‘rinbosari Jamshid Xodjayev raisligida o‘tdi. U kelib tushgan tashabbuslar bo‘yicha tegishli vazirlik va idoralarning pozitsiyalarini muvofiqlashtirib bordi. Sessiya ishida Investitsiyalar, sanoat va savdo vazirining o‘rinbosari Shohrux G‘ulomov hamda XIK kotibi Aziz Gafurov ishtirok etdi. Uchrashuvga Yevropa tiklanish va taraqqiyot bankining (YTTB) O‘zbekistondagi vakolatxonasi rahbari Andi Aranitasi moderatorlik qildi.

Muhokamalarning markazida tartibga solish, soliq va bojxona, infratuzilma, raqamlashtirish hamda moliya sohalarini qamrab olgan 116 ta tashabbusdan iborat jamlangan paket bo‘ldi. Ushbu takliflar investorlarning Kengash tarkibidagi mavzuviy ishchi guruhlarda olib borgan tizimli faoliyati yakunlari bo‘yicha shakllantirilgan.

Soliq va bojxona ma’murchiligi. EY kompaniyasi davlat-xususiy sheriklik loyihalari hamda elektr energiyasini sotib olish to‘g‘risidagi bitimlar (PPA) uchun soliq rejimini qonunchilikda mustahkamlashni, shuningdek, qo‘shimcha kapitalga kiritilgan hissalar soliqqa tortilishi qoidalarini aniq belgilashni taklif qildi. Masdar va China Energy kompaniyalari qayta tiklanuvchi energetika hamda energiyani saqlash tizimlari loyihalari uchun yer va mol-mulk soliqlari bo‘yicha imtiyozlar berish tartibini qayta ko‘rib chiqish tashabbusi bilan chiqdi. Deloitte va Voltalia investor faoliyat yuritayotgan har bir hududda doimiy muassasani ro‘yxatdan o‘tkazish talabini bekor qilish hamda mamlakatimizda o‘xshashi ishlab chiqarilmaydigan uskunalar importida QQSdan ozod etish mexanizmini joriy etish masalasini o‘rtaga tashladi.

Raqamli iqtisodiyot va sun’iy intellekt. EY, TBC Bank va Yandex kompaniyalarining qo‘shma tashabbuslari sun’iy intellekt sohasida huquqiy bazani yaratishga, jumladan, sohaga oid maxsus «Sun’iy intellekt to‘g‘risida»gi qonunni ishlab chiqish va tartibga soluvchi «qumloqlar»ni (regulatory sandboxes) ishga tushirishga qaratilgan. Takliflarning alohida bloki sun’iy intellektni qo‘llashda shaxsiy ma’lumotlarni himoya qilish, Katta ma’lumotlarni boshqarish milliy platformasini yaratish hamda aholi va kichik biznes subyektlari uchun elektron tijorat sohasida ta’lim dasturlarini yo‘lga qo‘yishga daxldordir. Bundan tashqari, onlayn va oflayn savdoda yakka tartibdagi tadbirkorlar uchun QQS ostonasini tabaqalashtirish masalasi ham ko‘tarildi.

Yer munosabatlari va investorlar huquqlarini himoya qilish. Kosta Legal kompaniyasi va BMTning Oziq-ovqat va qishloq xo‘jaligi tashkiloti (FAO) yer uchastkalarini tayyorlash va sotib olishning yuridik tartibini unifikatsiya qilish, yer ombudsmani institutini ta’sis etish hamda nizolarni sudgacha hal qilish uchun apellyatsiya komissiyalarini tuzishni taklif etdi.

Moliya bozori, korporativ boshqaruv va ESG. Vision Invest kompaniyasi O‘zbekistonni to‘g‘ridan-to‘g‘ri investitsiyalar va venchur kapitalining mintaqaviy xabi sifatida namoyon etish tashabbusini ilgari surdi. Crowe va EY ommaviy kompaniyalarning kuzatuv kengashlari tarkibida minimal gender standartini joriy etishni hamda mas’uliyatli biznes yuritishning (RBC) milliy standartlarini amaliyotga tatbiq qilish masalasini qo‘ydi. Islom taraqqiyot banki (ITB) esa «yashil sukuk» emissiyasi uchun huquqiy asos yaratish va islomiy sug‘urtani (takaful) joriy etish taklifini bildirdi.

Majlis yakunida Jamshid Xodjayev bildirilgan har bir tashabbus tarkibiy islohotlarni jadallashtirish uchun asos sifatida ko‘rilayotganini ta’kidladi. Erishilgan kelishuvlar majlisning rasmiy bayoni bilan rasmiylashtirilib, unda mas’ul vazirliklar va aniq ijro muddatlari belgilab qo‘yiladi. Aynan ushbu hujjat 2026-yil 18-iyun kuni Xorijiy investorlar kengashining IV yalpi majlisiga tayyorgarlik ko‘rish jarayonida monitoring olib borishning asosiy vositasi bo‘lib xizmat qiladi.