Milliy qadriyatlar – bebaho boyligimiz

Mamlakatimizda milliy liboslar targ‘ibotini kuchaytirish, yosh avlod ongiga millat ruhiyatini singdirish, ular hayotiga o‘zbekona mentalitet me’yorlarini olib kirish hamda milliy liboslarga mehr uyg‘otish maqsadida turli xil milliy liboslar festivali va shu ko‘rinishdagi tadbirlarning tashkil etilayotganligi ham bejiz emas.

Bugun poytaxtimizning Olmazor tumanidagi “Orzu” mahallasida “Milliy qadriyatlarimiz – bebaho boyligimizdir” mavzusida tadbir tashkil qilindi. Unda mahallaning faol xotin-qizlari, uy bekalari ishtirok etdi. Tadbirda o‘zbek millatining urf-odatlari va an’analarini targ‘ib etuvchi ko‘rgazmalar, bolalar va ayollar folklor jamoasining chiqishlari  namoyish etildi.

Tadbirda Bosh vazir o‘rinbosari Zulayho Mahkamova, Oila va xotin-qizlar qo‘mitasi raisi Ozoda Parpiboyeva hamda shahar va tuman mas’ullari so‘zga chiqib, har bir millatning tili, urf-odatlari, tarixi, madaniyati, an’analarini, barcha moddiy va ma’naviy boyliklarini, iqtisodiy, ijtimoiy-siyosiy hayotining barcha tomonlarini o‘z ichiga qamrab oladigan milliy qadriyatlar haqida o‘z fikr-mulohazalarini bildirdilar.