O‘zbekiston va Latviya o‘rtasidagi hamkorlik rivojlanmoqda

Latviya delegatsiyasi tashrifi doirasida O‘zbekiston Respublikasi investitsiyalar, sanoat va savdo vaziri Laziz Kudratov hamda Latviya transport vaziri Atis Švinka o‘rtasida muzokaralar o‘tkazildi. Shuningdek, O‘zbekiston–Latviya Hukumatlararo komissiyasining 9-yig‘ilishi va ikki mamlakat davlat idoralari hamda biznes vakillari ishtirokida O‘zbekiston–Latviya biznes-forumi tashkil etildi.

Tomonlar hamkorlikning bugungi holati va istiqbollarini, sanoat kooperatsiyasini kengaytirish, Markaziy Osiyo va Yevropa Ittifoqi o‘rtasidagi transport-logistika yo‘nalishlarini rivojlantirish, shuningdek raqamli texnologiyalar, qishloq xo‘jaligi va ta’lim sohalaridagi hamkorlikni muhokama qildilar. 2025-yil yakunlariga ko‘ra o‘zaro savdo hajmi 273,2 mln dollarni tashkil etdi. Tomonlar ushbu ko‘rsatkichni o‘rta muddatda 500 mln dollargacha yetkazish niyatini tasdiqladilar.

Biznes-forumda 20 dan ortiq latviyalik kompaniyalar, jumladan Latvijas dzelzceļš, Ventspils Free Port, Elektroniskie sakari, Intellog va MGK Building ishtirok etdi. Mazkur kompaniyalar temir yo‘l infratuzilmasi, port logistikasi, telekommunikatsiya, transport xizmatlari va qurilish texnologiyalari yo‘nalishlarida faoliyat yuritadi.

Tadbirlar yakunida O‘zbekiston–Latviya va Latviya–O‘zbekiston ishbilarmonlik hamkorligi kengashlari faoliyatini tiklash to‘g‘risidagi memorandum hamda iqtisodiy hamkorlikni mustahkamlash bo‘yicha Harakatlar rejasi imzolandi. B2B uchrashuvlari o‘tkazilib, logistika, sanoat, qishloq xo‘jaligi va raqamli iqtisodiyot sohalarida qo‘shma loyihalarni ishlab chiqish bo‘yicha kelishuvlarga erishildi.