Ichki ishlar vazirligi va hududiy organlari tomonidan oʻtkazilgan sayyor qabullar

Davlatimiz rahbari tomonidan belgilab berilgan ustuvor vazifalardan biri — aholi bilan ochiq va samarali muloqotni tizimli ravishda yoʻlga qoʻyishdan iborat.

Mazkur yoʻnalishda ichki ishlar organlari tomonidan fuqarolar bilan bevosita muloqotni taʼminlash, aholi murojaatlari va ehtiyojlarini atroflicha oʻrganish, kelib tushgan ariza va takliflarni qonunchilik talablari asosida oʻz vaqtida koʻrib chiqish hamda ular yuzasidan aniq chora-tadbirlar belgilash boʻyicha izchil ishlar amalga oshirilmoqda.

Joriy yilning 1-mart kuni Ichki ishlar vaziri tomonidan masʼul rahbarlar ishtirokida fuqarolarning sayyor qabul oʻtkazildi.

Fuqarolar uchun qulaylik yaratish, shuningdek, ob-havo sharoiti va hududiy masofani inobatga olgan holda qabul Toshkent shahri va Toshkent viloyati aholisi uchun bevosita, Qoraqalpogʻiston Respublikasi hamda viloyatlar aholisi uchun esa hududiy ichki ishlar organlari binolaridan videokonferens-aloqa orqali onlayn tarzda tashkil etish amaliyoti davom ettirildi.

Tadbir davomida Ichki ishlar vazirligi faoliyatiga oid jami 351 ta murojaat qayd etildi. Murojaatlarning asosiy qismi mol-mulk va pul mablagʻlarini undirish, yoʻl harakati xavfsizligini taʼminlash, tergovga qadar tekshiruv va surishtiruv hamda tergov harakatlari, shuningdek, kadrlar masalalari bilan bogʻliq muammolarni oʻz ichiga oldi.

Kelib tushgan murojaatlarning 186 tasi (53 foiz) qonunchilik talablari asosida ijobiy hal etildi. Qolgan 165 ta murojaat (47 foiz) boʻyicha qoʻshimcha tekshiruv, sohaviy organlar bilan hamkorlikda chora-tadbirlar koʻrish talab etilganligi sababli, ular belgilangan tartibda nazoratga olindi va masʼul shaxslarga ijrosini taʼminlash boʻyicha aniq topshiriqlar berildi.

Shu bilan birga, Qoraqalpogʻiston Respublikasi Ichki ishlar vazirligi, Toshkent shahar va Toshkent viloyati ichki ishlar bosh boshqarmalari hamda viloyatlar ichki ishlar boshqarmalari rahbarlari tomonidan joylarda oʻtkazilgan qabullar davomida 433 ta murojaat qabul qilindi. Ularning 160 tasi (37 foiz) qabul jarayonida ijobiy hal etilgan boʻlsa, 273 ta murojaat (63 foiz) belgilangan tartibda qoʻshimcha tekshiruv va nazorat asosida koʻrib chiqish uchun yoʻnaltirildi.

Sayyor qabul jarayonida aholini qiziqtirayotgan masalalar, huquqiy muammolar va ularni hal etish mexanizmlari atroflicha muhokama qilindi.