Investitsiya - qishloq xo‘jaligini taraqqiy ettiruvchi bosh omil

Tashrif dasturiga muvofiq, “Green gold work” MCHJ gulchilik klasteri faoliyati bilan tanishish barobarida, viloyatda agrar va oziq-ovqat sohalarini rivojlantirish masalalariga qaratilgan yig‘ilish o‘tkazildi.

Vazir Ibrohim Abdurahmonov rahbarligida tashkil etilgan yig‘ilishda vazirlik mas’ullari, viloyatning qishloq xo‘jaligi boshqarmasi boshliqlari, tizim tashkilotlari rahbarlari, sohaga aloqador shaxslar ishtirok etdi.

Viloyatning agrar va oziq-ovqat sohalarini rivojlantirish, investitsiyalarni o‘zlashtirish, eksport, yer o‘zlashtirish, aholi va yoshlarga yer ajratish, g‘alla parvarishi, chigit ekish, yangi bog‘-tokzorlarni barpo etish va boshqa masalalar bo‘yicha amalga oshirilgan ishlar hamda kelgusida amalga oshirish rejalashtirilgan vazifalar va erishiladigan ko‘rsatkichlar taqdimoti bilan boshlangan yig‘ilishda vazir Ibrohim Abdurahmonov eng avvalo bu kabi raqamlar hisobotni vijdonan yondashilgan holdagi aks ettirilgan bo‘lishi lozimligi qayd etdi.

Binobarin, viloyat eksport salohiyatini oshirish, aholi va yoshlar bandligini ta’minlash, shuningdek, oziq-ovqat xavfsizligini ta’minlashda jonbozlik ko‘rsatgan hamda belgilangan rejani ortig‘i bilan bajargan fermer xo‘jaligi rahbarlari rag‘batlantirildi.

Bunda eng asosiysi, har bir rahbar bugun viloyatda mahsulot ishlab chiqarish bilan birgalikda xorijga nima eksport qila oladi, qanday yangi investitsiya jalb qilish mumkin, har bir qarich yerda unumli foydalanilyaptimi, yoshlarga qanday sharoitlar yaratilmoqda, ularga qulay sharoit yaratib berilyaptimi kabi savollarga javob bera olishi va ishga mas’uliyat bilan yondashishi lozimligi qayd etildi.

Shuningdek, taqdimot davomida viloyatda joriy yil hosili uchun dehqon xo‘jaliklari tomonidan asosiy va takroriy maydonlarga ekiladigan qishloq xo‘jaligi ekinlaridan olinadigan hosil, aholi bandligini oshirish, zamonaviy sug‘orish texnologiyalarini joriy etish, Paxtachilik sohasida agrosanoat klasteri va kooperativlari faoliyatini rivojlantirish, joriy yil davomida agrar sohada amalga oshirilishi rejalashtirilgan ishlar, maqsadli investitsion loyihalarni jalb etish va kadrlar salohiyatini oshirish masalalari xususida so‘z yuritildi. Qolaversa, har bir tuman va shahar rahbarlari kunlik reja asosida ish olib borishi zarurligi qayd etildi.

Aytish kerak, bugun Andijon viloyatining har bir hududida qishloq xo‘jaligi boshqarmalari faoliyat olib bormoqda. Viloyatda olib borilayotgan islohotlar esa, qoniqarli darajada emas.

Tanqidiy ruhda o‘tgan yig‘ilishda viloyat yalpi ichki mahsuloti va eksport salohiyati ham yetarli bo‘lmagani, bu kabi sustkashliklarning sababi va joriy yil hosili uchun ekiladigan urug‘lik va kutilayotgan hosil, agrar sohada erishilgan kelishuvlar va loyihalar samaradorligini oshirish, bu boradagi hamkor tashkilotlar bilan samarali ishlash mexanizmini yo‘lga qo‘yish, xususan, qishloq xo‘jaligida ish jarayoni sekinlashib qolgan mavjud xorijiy investitsiya loyihalarining muammolarini aniqlash va qayta ko‘rib chiqish hamda ularga ijobiy yechim topish bo‘yicha samarali chora ko‘rish masalasi muhokama qilindi.

Vazir I.Abdurahmonov o‘z navbatida, Andijon viloyati qishloq xo‘jaligini ekologik jihatdan eng xavfsiz, bioxilma-xillikni qo‘llab-quvvatlaydigan usulda, suv resurslaridan oqilona foydalangan holda rivojlantirish, yangi yerlarni o‘zlashtirish, intensiv bog‘ yaratish, tabiiy va moliyaviy resurslardan foydalanish imkoniyatlarini kengaytirish, o‘z yechimini kutayotgan loyihalarni tizimli amalga oshirish qishloq xo‘jaligida qo‘shimcha qiymat zanjirini yaratishning muhim jihatlaridan biri ekanini qayd etdi.