Oʻzbekistonda Yaponiya universitetini tashkil etish loyihasi muhokama qilindi
2026-02-25 09:10:00 / Yangiliklar
Oliy taʼlim, fan va innovatsiyalar vaziri Qoʻngʻirotboy Sharipov Yaponiyaning Kibi xalqaro universiteti prezidenti Yuki Kake bilan uchrashdi.
Uchrashuv davomida mamlakatimizda Yaponiya universitetini tashkil etish boʻyicha qoʻshma loyihaning amalga oshirish bosqichlari, uning huquqiy, tashkiliy va infratuzilmaviy jihatlari atroflicha muhokama qilindi.
Muzokaralar chogʻida qoʻshma taʼlim dasturlarini yoʻlga qoʻyish, muhandislik va innovatsiya yoʻnalishlarida yuqori malakali kadrlar tayyorlash, ilmiy tadqiqotlar va akademik almashinuvni rivojlantirish masalalariga alohida eʼtibor qaratildi.
Tomonlar Oʻzbekiston Respublikasi Oliy taʼlim, fan va innovatsiyalar vazirligi hamda Kibi xalqaro universiteti oʻrtasida imzolangan akademik hamkorlik toʻgʻrisidagi kelishuv loyihani amaliy bosqichga olib chiqish uchun mustahkam institutsional asos boʻlib xizmat qilishini taʼkidladilar.