"Yangi O‘zbekiston" universiteti Markaziy Osiyoda birinchi bo‘lib Oxford Hub platformasini ishga tushirdi

Oksford universiteti so‘nggi yillarda Times Higher Education World University Rankings reytingida ketma-ket ravishda jahonning birinchi raqamli universiteti sifatida e’tirof etilib kelinmoqda. Shuningdek, QS World University Rankings reytingida ham doimiy tarzda eng yuqori pog‘onalarda qayd etib kelinadi.

Bunday nufuzli universitet bilan hamkorlik "Yangi O‘zbekiston" universitetining xalqaro akademik maydondagi mavqeini yangi bosqichga olib chiqadi.

Mazkur loyiha nainki O‘zbekiston, balki butun Markaziy Osiyo oliy ta’lim tarixida muhim voqea sanaladi. "Yangi O‘zbekiston" universiteti mintaqada birinchi bo‘lib Oksford universiteti bilan bunday keng qamrovli va tizimli akademik platformani yo‘lga qo‘ymoqda.

Oxford Hub O‘zbekiston oliy ta’lim muassasalari uchun Oksford universitetining yetakchi olimlari, mutaxassislarining ilg‘or tadqiqotlariga rasmiy va tizimli asosda kirish imkoniyatini yaratadi. Ushbu tashabbus Oksford universiteti tarkibidagi Wolfson kolleji huzurida faoliyat yurituvchi Oxford Birsöz Initiative tomonidan muvofiqlashtiriladi hamda Buyuk Britaniya hukumati ko‘magida amalga oshiriladi.

Tantanali tadbirda maktabgacha va maktab ta’limi vaziri E’zoza Karimova keyingi yillarda ta’lim sohasida ilg‘or tashabbuslar ilgari surilayotganini ta’kidladi. Ushbu tashabbuslar ta’limdagi xalqaro hamkorlikning tobora kengayishida muhim omil bo‘layotgani e’tiborga molik. E’tirof etilganidek, "Yangi O‘zbekiston" universiteti bilan Oksford universiteti o‘rtasida Oxford Hub'ning tashkil etilishi sun’iy intellekt, muhandislik, ilg‘or texnologiyalar va ilm-fanning turli yo‘nalishlarida yurtimiz va britaniyalik mutaxassislar, olimlar o‘rtasida keng hamkorlikka, yangi ilmiy tadqiqotlarga poydevor bo‘ladi.

—Ushbu platformaning ishga tushirilishi akademik hamkorlik, professorlar almashinuvi, ilmiy tadqiqotlarda ham alohida ahamiyat kasb etadi, — dedi maktabgacha va maktab ta’limi vaziri E’zoza Karimova.

Tantanali tadbirda Buyuk Britaniyaning Markaziy Osiyo va Ozarbayjon bo‘yicha savdo vakili lord Jon Olderdaysga "Yangi O‘zbekiston" universitetining "Faxriy professori" unvoni topshirildi.

—O‘zbekistonda ta’lim sohasida katta o‘zgarishlar yuz bermoqda, — dedi Buyuk Britaniyaning Markaziy Osiyo va Ozarbayjon bo‘yicha savdo vakili lord Jon Olderdays. — Bu o‘zgarishlar mamlakat taraqqiyotiga xizmat qilishi shubhasiz.

Darhaqiqat, mamlakatimiz hamda jahonning eng nufuzli oliy o‘quv dargohlari o‘rtasidagi hamkorlikning kuchayishi ta’lim sifatining yanada takomillashuviga xizmat qiladi.