Sud-tibbiy ekspertiza sohasida xalqaro hamkorlik masalalari muhokama qilindi

Dastlab mehmonlar muassasada yaratilgan shart-sharoitlar, bu yerdagi zamonaviy laboratoriyalar hamda sud-tibbiy ekspertiza yo‘nalishida olib borilayotgan ishlar bilan yaqindan tanishdi.
Shundan so‘ng uch tomonlama uchrashuv o‘tkazilib, o‘zaro hamkorlik doirasida amalga oshirilayotgan qo‘shma loyihalarni rivojlantirish bilan bog‘liq chora-tadbirlar ko‘rib chiqildi.

Ta’kidlanganidek, o‘tgan yili markazga AQSH va BMTning Giyohvand moddalar va jinoyatchilikka qarshi kurashish bo‘yicha boshqarmasi ko‘magida “O‘zbekiston Respublikasi sud-ekspertlik muassasalarining imkoniyatlarini mustahkamlash – III faza” dasturi doirasida “Shimadzu Corporation” kompaniyasida ishlab chiqarilgan, umumiy qiymati 121 ming AQSH dollariga teng bo‘lgan yangi avlod xromatomass spektrometr apparati keltirildi.

Bu esa muassasaning laboratoriya imkoniyatlarini sezilarli darajada kengaytirib, narkotik moddalar, psixotrop vositalar va ularning qo‘shimchalari bo‘yicha aniq tahlillar olib borish imkonini yanada kengaytirdi.

Muloqotda sohaga ilg‘or xalqaro tajribani joriy etish, kadrlar salohiyatini oshirish, tizimni raqamlashtirish, markaz va uning hududiy filiallarini zamonaviy laboratoriya uskunalari bilan ta’minlash hamda ilmiy-tadqiqot ishlarini qo‘llab-quvvatlash masalalari muhokama etildi.

Uchrashuv yakunida tomonlar narkotik moddalarning noqonuniy aylanmasi oldini olish, jinoyatchilikka qarshi samarali kurashish va sud-tibbiy ekspertiza sohasini yanada rivojlantirish bo‘yicha hamkorlikni yangi bosqichga olib chiqishga kelishib oldilar.

Shuningdek, markaz hamda uning hududiy filiallari xodimlari bilan o‘tkazilgan muloqotda joylarda sud-tibbiy ekspertiza xizmatini takomillashtirish va yangi loyihalarni qo‘llab-quvvatlash bo‘yicha fikr almashildi.