Bugun, 4-iyun kuni Yevroosiyo Iqtisodiy Ittifoqi Hukumat rahbarlari Kengashining navbatdagi majlisi bo‘lib o‘tdi.

Unda Armaniston Respublikasi Bosh vaziri o‘rinbosari M.Grigoryan, Belarus Respublikasi Bosh vaziri R.Golovchenko, Qozog‘iston Respublikasi Bosh vaziri O.Bektenov, Rossiya Federatsiyasi Hukumati Raisi M.Mishustin, Qirg‘iz Respublikasi Vazirlar Mahkamasi raisi A.Japarov ishtirok etdi. Kuba Bosh vaziri M.Krus video murojaat bilan qatnashdi. Ozarbayjon Respublikasi Bosh vaziri A.Asadov faxriy mehmon sifatida nutq so‘zladi.

Majlisda O‘zbekiston Respublikasi Bosh vaziri Abdulla Aripov so‘zga chiqdi.

O‘zbekiston YEOIIda kuzatuvchi sifatidagi davrida a’zo davlatlar bilan ko‘p tomonlama iqtisodiy hamkorlikni jadal rivojlantirayotgani, yangi o‘sish nuqtalarini shakllantirish borasida izchil ishlar amalga oshirilayotgani ta’kidlandi.

O‘zbekiston savdo va yuk tashishni raqamlashtirish, elektron tijorat va iqlim masalalari bo‘yicha sohaviy loyiha hamda dasturlarga qo‘shilgani ma’lum qilindi.

Hozirgi kunda mintaqa mamlakatlari iqtisodiyotining raqobatdoshligidan faol foydalanish muhim ahamiyatga ega ekani alohida ta’kidlandi.

Bunda O‘zbekiston Respublikasi Prezidenti Shavkat Mirziyoyevning may oyida Oliy Yevroosiyo iqtisodiy kengashining o‘tgan yig‘ilishida ilgari surgan tashabbuslarini hayotga tatbiq etish muhimligi qayd etildi.

Yig‘ilishda O‘zbekiston tomoni YEOII mamlakatlari bilan savdodagi to‘siqlar va cheklovlarni o‘zaro bartaraf etish, sanitariya, fitosanitariya va veterinariya nazoratining axborot tizimlarini integratsiyalashtirish, “Shimol-Janub” transport koridorini Janubiy va Janubi-Sharqiy Osiyo hamda Yaqin Sharq bozorlari tomon yo‘naltirish, sanoat kooperatsiyasini yanada rivojlantirishga qaratilgan “Yo‘l xaritasi”ni birgalikda ishlab chiqish, Samarqand shahrida YEOII ishbilarmonlar kengashining birinchi qo‘shma forumini o‘tkazishni taklif qildi.

Shuningdek, “yashil” koridor tizimlarini kengaytirish, qo‘shma agrosanoat klasterlari va logistika markazlarini tashkil etish, “yashil” va suvni tejaydigan texnologiyalarni joriy etish, iqlim o‘zgarishi oqibatlarini bartaraf etishda umumiy yondashuvlar va yaqin hamkorlikni ishlab chiqish masalalariga ham alohida e’tibor qaratildi.