Gender tenglikni ta’minlashda fuqarolik jamiyati institutlari bilan hamkorlik kengaytirilmoqda

Uchrashuv davomida “Gender strategiyasi – 2030” doirasida amalga oshirilayotgan islohotlar, xotin-qizlarning huquq va manfaatlarini himoya qilish, oila institutini mustahkamlash, zo‘ravonlikning oldini olish, ta’lim, bandlik va tadbirkorlik sohalarida teng imkoniyatlarni ta’minlash masalalari muhokama qilindi.

Tadbirda ta’kidlanganidek, so‘nggi yillarda O‘zbekistonda gender siyosati yangi bosqichga ko‘tarilib, davlat siyosatining barcha sohalarida gender yondashuvini joriy etish ustuvor vazifa sifatida belgilangan. 2030 yilga qadar gender tenglikka erishish strategiyasi xotin-qizlar va erkaklar uchun teng huquq va imkoniyatlarni ta’minlashga qaratilgan kompleks hujjat sifatida amalga oshirilmoqda.

Shuningdek, xotin-qizlarning ta’limga to‘liq qamrovini ta’minlash, ularni zamonaviy kasblar va strategik sohalarga keng jalb etish, iqtisodiy faollikni oshirish, tadbirkorlikni qo‘llab-quvvatlash bo‘yicha ko‘rilgan chora-tadbirlar haqida ma’lumot berildi. Xotin-qizlarga nisbatan tazyiq va zo‘ravonlikning oldini olish, profilaktika va reabilitatsiya mexanizmlarini takomillashtirish masalalariga alohida e’tibor qaratildi.

Uchrashuvda fuqarolik jamiyati institutlari, ayniqsa nodavlat notijorat tashkilotlarining “Gender strategiyasi – 2030”ni amalga oshirishdagi muhim o‘rni qayd etildi. Tomonlar o‘zaro hamkorlikni kuchaytirish, qo‘shma loyihalarni amalga oshirish hamda amaliy tashabbuslarni qo‘llab-quvvatlash bo‘yicha takliflar bildirdilar.

Uchrashuv yakunida mazkur muloqot gender tenglikni ta’minlash, xotin-qizlarni ijtimoiy-iqtisodiy qo‘llab-quvvatlash va fuqarolik jamiyati bilan samarali hamkorlikni yanada rivojlantirishga xizmat qilishi ta’kidlandi.