Investitsion loyihalarni amaliyotga joriy qilish bugungi kun talabi

Samimiy ruhda boshlangan uchrashuvda bugungi kunda ikki mamlakat oʻrtasida olib borilayotgan mustahkam hamkorlik aloqalari, jumladan, qishloq xoʻjaligida taʼlim, innovatsiya, urug‘chilik hamda oziq-ovqat xavfsizligini taʼminlash borasida olib borilayotgan hamkorlik masalalari eʼtirof etildi.

Aytish kerak, mamlakatlarimizning ijtimoiy-iqtisodiy taraqqiyoti, oʻzaro doʻstlik va mustahkam ishonchga asoslangan hamkorlik negizida taraqqiy etmoqda. Tashkil etilgan muloqot ham ayni shu jihatlarga eʼtibor qaratildi.

Uchrashuv davomida, “Ekono-tex” MChJ bilan tuzilgan hamkorlik bitimiga asosan, seleksiya usulida don va dukkakli oʻsimliklarning yangi urugʻlik navlarini yaratish,  Rossiya Federatsiyasining neft-gaz va agrosanoat komplekslari ehtiyojlarini qondirish maqsadida mamlakatimizda guar oʻsimligini yetishtirish boʻyicha pilot loyihani amalga oshirish masalalari muhokama qilindi.

Vazir mamlakatimiz qishloq xoʻjaligi sohasida xorijiy investitsiya loyihalarini amaliyotga tatbiq etish uchun hukumat tomonidan xorijiy investorlar uchun yaratilgan muhit va ularga beriladigan imtiyozlar haqida soʻz yuritar ekan, bu kabi investitsion loyihalar ikki mamlakat uchun ham manfaatli hamkorlik aloqalarini mustahkamlashda debocha boʻlib xizmat qilishini alohida eʼtirof etdi.

Oʻz navbatida, mazkur loyihani tez fursatlarda mamlakatimizda tatbiq etish, shuningdek, loyiha boʻyicha yechilishi kutilayotgan masalalar yuzasidan oʻrganish olib borishni hamda amaliy ishlarni bajarilishini nazorat qilish boʻyicha masʼullarga topshiriq berdi.

Zero, bu kabi investitsion loyihalarning samarali amalga oshirilishi, shubhasiz, respublikaning ijtimoiy-iqtisodiy rivojlanishiga sezilarli taʼsir koʻrsatadi va zamonaviy taraqqiyotning yangi qirralarini oʻzlashtirishga xizmat qiladi.