O‘zbekiston – Italiya: agrar sohadagi hamkorlik istiqbollari muhokama qilindi

Mazkur konferensiya O‘zbekistonning investitsiyaviy salohiyati, amalga oshirilayotgan iqtisodiy islohotlar hamda Italiya bilan savdo-iqtisodiy hamkorlikni yanada kengaytirish masalalariga bag‘ishlandi.

Unda O‘zbekiston Respublikasi qishloq xo‘jaligi vaziri Ibrohim Abdurahmonov video-konferens-aloqa shaklida ishtirok etdi.

Tadbirni Italiya Respublikasi qishloq xo‘jaligi vaziri Franchesko Lollobrijida kirish so‘zi bilan ochib berar ekan, ikki mamlakat o‘rtasidagi agrar, iqtisodiy va ta’lim sohalaridagi hamkorlik aloqalarini e’tirof etdi.

Vazir Ibrohim Abdurahmonov esa o‘z nutqida ikki tomonlama ko‘lamli iqtisodiy va institutsional islohotlar, xususan, qishloq xo‘jaligi sohasida olib borilayotgan tizimli yangilanishlar haqida batafsil ma’lumot berdi. 

Qayd etilishicha, so‘nggi yillarda qishloq xo‘jaligi tarmog‘ida o‘sish sur’atlari yiliga o‘rtacha 4 foizni tashkil etmoqda. O‘tgan yilda agro-ozuqa mahsulotlari eksporti hajmi 3,2 milliard AQSh dollariga yetib, O‘zbekiston mahsulotlari 83 ta mamlakat bozoriga yetkazib berilgan.

O‘zbekiston va Italiya o‘rtasida o‘zaro ishonch hamda ikki tomon manfaatlariga asoslangan qator loyihalar doirasidagi hamkorlik istiqbollari muhokama qilinar ekan, agrar sohadagi hamkorlik izchil rivojlanib borayotgani alohida ta’kidlandi. Shuningdek, ilmiy va ta’lim sohasidagi hamkorlik doirasida Samarqand shahrida Italiyaning Tushia universiteti filiali faoliyati yo‘lga qo‘yilgani qayd etildi.

Tadbir davomida, kelgusidagi ustuvor rejalardan biri sifatida 2026-yil 23–24-mart kunlari Toshkent shahrida o‘tkazilishi rejalashtirilgan “Italiya – Markaziy Osiyo – Ozarbayjon” xalqaro forumiga alohida e’tibor qaratildi. 

Mazkur forum innovatsiyalar, regenerativ qishloq xo‘jaligi va raqamli texnologiyalar asosida barqaror agroekotizimlarni rivojlantirishga xizmat qilishi, shuningdek, Italiya biznes doiralari uchun yangi investitsiya imkoniyatlarini yaratishi kutilmoqda. 

Muloqot yakunida esa, O‘zbekiston tomoni Italiya bilan uzoq muddatli, strategik va o‘zaro manfaatli hamkorlikni yanada mustahkamlashdan manfaatdor ekani bildirildi.