"Alla festivali": millatlararo totuvlik va oilaviy qadriyatlar timsoli

Tadbirda Bosh vazir o‘rinbosari — Oila va xotin-qizlar qo‘mitasi raisi Zulayho Maxkamova, Yakkasaroy tumani hokimi Nilufar Allabergenova, O‘zbekiston Respublikasi Millatlararo munosabatlar va xorijdagi vatandoshlar masalalari bo‘yicha qo‘mitasi raisi Qahramon Sariyev, shuningdek, turli millat vakillari, ijodiy jamoalar va keng jamoatchilik ishtirok etdi.

Mazkur madaniy-ma’rifiy tadbir turli millat vakillaridan iborat oilalarni bir maydonga jamlab, yurtimizda hukm surayotgan tinchlik, o‘zaro hurmat va mehr-oqibat muhitining yorqin ifodasiga aylandi. Festival orqali ona allalari timsolida oila muqaddasligi, ona mehri va tinch-totuv hayot g‘oyalari keng targ‘ib etildi.

Shuningdek, tadbir doirasida Sog‘liqni saqlash vazirligi mas’ul xodimi tomonidan yosh onalarga bolani parvarish qilish, go‘dak salomatligini asrash hamda bolani ona suti bilan oziqlantirishning beqiyos ahamiyati yuzasidan mazmunli ma’ruza qilindi. Unda ona suti bolaning sog‘lom rivojlanishi, immunitetini mustahkamlash va kelgusida barkamol avlodni voyaga yetkazishdagi muhim omil ekani alohida ta’kidlandi. Ma’ruza davomida yosh onalarga amaliy tavsiyalar berilib, sog‘lom ona va bola — sog‘lom jamiyat poydevori ekani keng yoritildi. Ushbu tavsiyalar festivalning ma’naviy-ma’rifiy ruhini yanada boyitib, tadbir mazmuniga amaliy ahamiyat baxsh etdi.

Festival doirasida ijro etilgan turli millatlarga xos ona allalari tomoshabinlarga yuksak ruh, iliq kayfiyat ulashib, madaniy rang-baranglik va mushtarak qadriyatlar uyg‘unligini namoyon etdi.

“Alla festivali” millatlararo totuvlikni mustahkamlash, oilani jamiyatning eng muhim tayanchi sifatida e’tirof etish, shuningdek, ma’naviy qadriyatlarni yosh avlod ongiga singdirishda muhim ahamiyat kasb etadigan madaniy tashabbus sifatida yuksak baholandi. Yakunda faol ishtirokchilarga tadbir tashkilotchilarining esdalik sovg'alari topshirildi.