Tokioda O‘zbekiston Respublikasi madaniyat vaziri Ozodbek Nazarbekov hamda Yaponiya jamg‘armasi raisi Shinya Kurosava o'rtasida hamkorlik uchrashuvi bo‘lib o‘tdi

Ayni kunlarda Yaponiyada “O‘zbekiston madaniyati kunlari” tadbirlari bo‘lib o‘tmoqda.

Kuni kecha Tokio shahridagi mingga yaqin o‘ringa ega “Ginza” saroyida Yaponiyada “O‘zbekiston madaniyati kunlari” tadbirlarining ochilish marosimiga bag‘ishlangan  konsert dasturi bo‘lib o‘tdi. Shuningdek, “O‘zbekiston madaniyati kunlari” tadbirlari doirasida “Yangi O‘zbekiston” fotoko‘rgazmasi ham tashkil etildi.

18-dekabr kuni Tokioda O‘zbekiston respublikasi madaniyat vaziri Ozodbek Nazarbekov hamda Yaponiya jamg‘armasi raisi Shinya Kurosava o'rtasida hamkorlik uchrashuvi bo‘lib o‘tdi.

“Yaponiya jamg‘armasi — jahonda madaniy diplomatiyaning eng nufuzli va ta’sirli instituti sifatida tan olingan. Jamg‘armaning Sharq va Gʻarb o‘rtasidagi madaniy va intellektual muloqotni mustahkamlashga qo‘shgan hissasi katta qadr-qimmatga ega. O‘zbekiston Yaponiyaning umumiy qadriyatlari — milliy an’analarga hurmat, ta’lim va nomoddiy merosga e’tibor, innovatsiya va yangilikka intilish — biz uchun mustahkam poydevor vazifasini o‘taydi. Jamg‘arma bilan hamkorlikni izchil kengaytirish biz uchun o‘ta muhim sanaladi. Bugungi muloqotimiz ana shu yo‘nalishda amaliy qadamlar tashlash uchun qimmatli imkoniyat deb bilaman” – dedi vazir Ozodbek Nazarbekov.

Uchrashuv davomida Hamkorlik bo‘yicha bir qator takliflar ko‘rib chiqildi, jumladan: 

— O‘zbekiston va Yaponiya o‘rtasida san’at, teatr va musiqa yo‘nalishlarida qo‘shma almashinuv dasturlarini kuchaytirish;
— Nomoddiy madaniy meros, san’at tarixi borasida qo‘shma tadqiqot loyihalarini yo‘lga qo‘yish;
— O‘zbekistonda madaniyat sohasida ta’lim muassasalarida yapon tili o‘qitish markazlari, madaniy klublarni tashkil etish va mazkur loyihalarni Japan Foundation tomonidan qo‘llab-quvvatlash;
— Madaniyat sohasidagi ta’lim muassasalari uchun Jamg‘arma tomonidan maxsus grant mablag‘larini joriy etish;
— Madaniyat sohasidagi ta’lim muassasalarida tahsil olayotgan talabalar uchun “Japan Foundation Fellowship for Arts and Culture in Asia” dasturi doirasida stipendiya olishni yo‘lga qo‘yish;
  — Nomoddiy madaniy merosni raqamlashtirish, virtual ko‘rgazmalar, multimedia loyihalari bo‘yicha Yaponiya tajribasini O‘zbekistonga tatbiq etish;
— Qo‘shma raqamli platforma yoki onlayn madaniy resurs yaratish.

Uchrashuv yakunida,  Yaponiya jamg‘armasi bilan hamkorlik O‘zbekiston uchun nafaqat madaniy almashinuv, balki xalqlarimiz o‘rtasidagi o‘zaro ishonch va do‘stlikni mustahkamlashning muhim vosita ekanligi, bizning umumiy maqsadimiz — ikki millat o‘rtasidagi madaniy va ma’rifiy yaqinlikni yanada kengaytirish ekanligi yana bir bor ta’kidlandi.