Koreyaning Chxunchxonnam-do provinsiyasi universitetlari bilan hamkorlik faollashmoqda

Koreya tomonidan Koreya-O‘zbekiston biznes uyushmasi raisi Kim Changkeon (Kim Edvard), Chxunchxunnam-do provinsiyasining Investitsiyalar va sanoat boshqarmasi boshlig‘i Yun Ju Yong, Xalqaro aloqalar professori Kim Song Jun, Sonmun universiteti prezidenti Mun Sung Je, Sunchunxyan universiteti prezidenti Kim Song Vular ishtirok etdi.

Uchrashuvda Koreyaning Chxunchxonnam-do provinsiyasi universitetlari bilan respublika oliy ta’lim muassasalari o‘rtasida akademik va ilmiy hamkorlik aloqalarini yo‘lga qo‘yish va rivojlantirish masalalari muhokama qilindi.

Vazir K.Sharipov oliy ta’lim, fan va innovatsiyalar sohasida olib borilayotgan islohotlar, hozirda O‘zbekistonda Janubiy Koreya universitetlarining 4 ta filiali (Inxa, Adju, Puchon universitetlarining Toshkent shahridagi filiallari, Farg‘ona shahridagi Koreya xalqaro universiteti) muvaffaqiyatli faoliyat ko‘rsatayotgani haqida ma’lumot berdi. Xususan, O‘zbekiston iqtisodiyotni rivojlantirish borasida ko‘proq texnika va muhandislik fanlarni rivojlantirishga hamda ushbu sohalarda kadrlar tayyorlash bilan bog‘liq bo‘lgan hamkorlikka ko‘proq e’tibor qaratilayotganligiga urg‘u berdi.

O‘z navbatida, Koreya Respublikasining Chxunchxonnam-do provinsiyasi gubernatori Kim Te Xim nutqida ikki mamlakat uchun hamkorlikning asosiy va muhim yo‘nalishi ta’lim sohasi hisoblanishini qayd etdi. 

Ayni paytda Chxunchxonnam-do provinsiyasi qonunchiligida, xususan o‘qish bilan ishlashni uyg‘unlashtirish masalalari bo‘yicha katta o‘zgarishlar kutilayotgani, xususan Chxunchxonnam-do provinsiyasi universitetlarida o‘qiyotgan  O‘zbekistonlik iqtidorli talabalar uchun bir vaqtning o‘zida ishlash imkoniyatini yaratish, ularni ishga joylashtirish va kelgusida to‘laqonli ish bilan ta’minlash borasida barcha sharoitlar yaratilayotgani to‘g‘risida xabar berdi.  
  
Bu borada vazir Q. Sharipov yuqorida keltirilgan masalalar qo‘llab-quvvatlanishi, shu bilan birga ta’lim sifatini oshirish muhim ahamiyat kasb etishini ta’kidladi. Xususan, o‘zaro talabalar almashinuvi, professor-o‘qituvchilarning Koreya universitetlarida stajirovka o‘tash borasidagi aloqalarni kengaytirish ko‘rsatib o‘tildi.

Muzokaralar davomida Sonmun va Sunchunxyan universitetlari hamda O‘zbekiston milliy universiteti o‘z faoliyatlari, ta’lim va hamkorlik yo‘nalishlari haqida to‘xtalinib, kelgusida hamkorlikda ishlash tayyorligini bildirdi.  

Uchrashuv yakunida O‘zbekiston milliy universiteti bilan Koreyaning Sunmun universiteti o‘rtasida anglashuv memorandumi imzolandi.