“Saodat” — ayollar ovozi: bir asrlik yo'l

Ushbu nashr jurnalning bir asrlik tarixida ayol qalbi, tafakkuri va jamiyatdagi faolligini aks ettirgan eng sara maqola va g‘oyalarni jamlagani bilan alohida ahamiyat kasb etadi.

Taqdimot marosimida O‘zbekiston Yozuvchilar uyushmasi raisi Sirojiddin Sayyid, “Yangi O‘zbekiston” gazetasi bosh muharriri Salim Doniyorov, senator, taniqli shoir Mahmud Toir, shuningdek yetuk olimlar, adabiyotshunoslar va keng adabiy jamoatchilik vakillari ishtirok etdi. Mehmonlar o‘z chiqishlarida “Saodat” jurnalining milliy matbuotimiz tarixidagi o‘rni, uning ayollar adabiyoti va tafakkurini shakllantirishdagi beqiyos hissasi, bugungi kunda ham zamon bilan hamnafas holda rivojlanib borayotgani haqida fikr bildirdilar.

“Yangi O‘zbekistonda xotin-qizlar faqat ijtimoiy hayot ishtirokchisi emas, balki islohotlarning faol tashabbuskori sifatida maydonga chiqmoqda. "Saodat" ana shu yangi tafakkurni targ‘ib etuvchi yuksak minbarga aylandi”, — dedi Bosh vazir o'rinbosari Zulayho Maxkamova o'z chiqishida.

Ta’kidlanganidek, “Saodat” jurnali yuz yil davomida nafaqat bosma nashr, balki ayollar uchun ma’naviy minbar, jamiyatda sog‘lom fikr va ma’rifat targ‘ibotchisi bo‘lib kelmoqda. Turli davr va sharoitlarda ham jurnal ayol sha’ni, oila qadri, ma’naviyat, adabiyot va san’at masalalarini ustuvor yo‘nalish sifatida saqlab, o‘z nufuzini mustahkamlab bordi. Uning sahifalarida yetuk adiblar, shoiralar va yosh ijodkorlarning asarlari chop etilib, ko‘plab iste’dodlar kamol topdi.

Bugungi Yangi O‘zbekiston sharoitida “Saodat” jurnalining mazmuni va mavzu doirasi yanada kengaydi. Jurnal ayollarning ijtimoiy-siyosiy faolligi, tadbirkorlik tashabbuslari, ilm-fan va madaniyatdagi yutuqlari, shuningdek, ularning huquq va imkoniyatlarini kengaytirishga qaratilgan islohotlarni izchil yoritib kelmoqda. Inson qadrini ulug‘lash, gender tenglik, oila mustahkamligi va ma’rifatli jamiyat barpo etish kabi g‘oyalar bugun jurnal sahifalarining bosh mezoniga aylangan.

“Saodat” — ayollar ovozi” kitobi esa ushbu jarayonlarning mantiqiy davomi bo‘lib, o‘tmish va bugunni bog‘lagan, kelajak avlodga yo‘l ko‘rsatuvchi muhim ma’naviy manba sifatida baholanmoqda. Ushbu nashr jurnalning bir asrlik tajribasi va Yangi O‘zbekiston g‘oyalari uyg‘unligining yorqin ifodasi bo‘ldi.

Saodat” jurnali tashkil etilganining 100-yilligi munosabati bilan oʻtkazilgan nufuzli tadbir doirasida nashr jamoasiga alohida hurmat va eʼtirof ramzi sifatida Prezident sovgʻasi — avtomobil topshirildi. Mazkur sovgʻani Oʻzbekiston Respublikasi Bosh vazirining oʻrinbosari — Oila va xotin-qizlar qoʻmitasi raisi Zulayho Maxkamova tantanali ravishda taqdim etdi.