Хalqaro ilm-fan va texnologiya konferensiyasida o‘zbekistonlik yosh olimlar ishtirok etdi

Tadbir Oʻzbekiston, Ozarbayjon, Armaniston, Belarus, Qozogʻiston, Qirgʻiziston, Rossiya, Tojikiston va Turkmaniston oʻrtasidagi hamkorlikni mustahkamlash, yosh olimlar tashabbuslarini qoʻllab-quvvatlash va istiqbolli ilmiy ishlanmalarni ilgari surish maqsadida tashkil etildi.

Konferensiyada Oʻzbekiston Respublikasi Oliy taʼlim, fan va innovatsiyalar vaziri Qoʻngʻirotboy Sharipov ham ishtirok etib, mamlakatimiz nomidan rasmiy delegatsiya ishida qatnashdi.

Tadbir doirasida ishtirokchi davlatlar delegatsiyalari rahbarlariga xalqaro yosh olimlar tomonidan ishlab chiqilgan loyihalarning final bosqichiga saralangan namunalari taqdim etildi. Loyihalar tanlovi bir necha bosqichda oʻtkazilib, 2025-yil noyabr oyida MDHning 2026–2035-yillarga moʻljallangan ilmiy-texnologik rivojlanish strategiyasiga muvofiq ravishda yoshlar ilmiy ishlari saralab olindi. 60 ta arizadan 16 ta loyiha ochiq muhokamaga tavsiya etildi va ular V Yosh olimlar kongressi doirasida taqdim etildi. Ekspertlar xulosalariga koʻra 5 ta loyiha konferensiya finalida ishtirok etish huquqini qoʻlga kiritdi.

Finalchi loyihalar yangi energiya manbalarini yaratish, qishloq va suv xoʻjaligida zamonaviy genetik texnologiyalar qoʻllash, yuqori texnologiyali sanoat mahsulotlarini ishlab chiqish, atrof-muhitga taʼsirni kamaytirish hamda “megasayens” toifasidagi unikal ilmiy inshootlardan foydalanish kabi ustuvor yoʻnalishlarda amalga oshirilgan ilmiy ishlanmalarni oʻz ichiga oladi.

Tadbirda delegatsiya rahbarlari tomonidan loyihalar yuzasidan savollar berildi, ularning amaliy qiymati va ilmiy ahamiyati muhokama qilindi, yosh tadqiqotchilarga taklif va tavsiyalar bildirildi.