Iqtisodiyotini o‘zgartirishda sun’iy intellektning roli qanday?

Sessiyaga SocraticsAI va TRACE Capital Holdings bosh direktori Timoti Yun moderatorlik qildi.

Panel sessiyasi ma’ruzachilari quyidagilar bo‘ldi:

- Sherzod Shermatov, O‘zbekiston raqamli texnologiyalar vaziri

- Antonio Benjamin, Citigroup’ning sobiq texnik direktori

- Aleksandr Kraynov, Yandex Machine Intelligence Laboratoriyasi rahbari

- Andrea Lovato, Data Volt Fyuchers va yechimlar direktori

Tadbir davomida mutaxassislar sunʼiy intellektga asoslangan algoritmlar barqaror rivojlanish va innovatsiyalarni taʼminlovchi oʻzgarishlarda qanday muhim rol oʻynashini muhokama qildi. Ular SI yordamida jarayonlarni optimallashtirish, odatiy vazifalarni avtomatlashtirish va qimmatli ma'lumotlarni olish masalalarini ko'rib chiqdi.

Shuningdek, sun’iy intellektning kirib kelishi natijasida kutilayotgan o‘zgarishlar, inklyuziv va barqaror kelajakni ta’minlash uchun ushbu katta siljishga tayyorgarlik ko‘rish zarurati muhokama qilindi.

Ekspertlar sunʼiy intellektning mintaqaviy va jahon iqtisodiyotini oʻzgartirishdagi oʻrni, uning taʼsiri va muammolarini tahlil qildi.

O‘zbekiston raqamli texnologiyalar vaziri Sherzod Shermatov SI odamlar hayotini osonlashtirishga yordam berishi kerakligini ta’kidladi.

“Bu SI ning aynan biz qidirayotgan jihatidir. Sun’iy intellekt haqida turli xil tushunchalar mavjud. Shu bilan birga, biz uning keyingi rivojlanishi haqida o‘ylashimiz va jamiyatimiz uchun mumkin bo‘lgan tahdidlarning oldini olishimiz kerak.

SI keng ommaning malakasini oshirish uchun ajoyib vosita sifatida ishlatilishi mumkin. Hamma SI ning ko‘plab imkoniyatlarini gapiradi va undan foyda olishga harakat qiladi. Biz ham SI uchun Datavolt bilan juda muhim loyiha — toʻliq yashil maʼlumotlar markazini ishga tushirdik. Bu juda noyob loyiha, chunki u yashil energiya bilan quvvatlanadi”, — dedi vazir.

Citigroup investitsiya bankining sobiq texnik direktori Antonio Benjamin SI da nafaqat O‘zbekiston, balki barcha davlatlar uchun xavf ko‘rishini ta’kidladi.

“O‘zbekiston va har bir davlat uchun milliy va suveren sun’iy intellekt strategiyasiga ega bo‘lishi juda muhim. Bu strategiya mamlakatingizning qadr-qimmati, tarixi va milliy an’analarini o‘zida mujassam etishi kerak”, — deya o‘z fikrini bildirdi u.

Yandex Machine Intelligence Laboratoriyasi rahbari Aleksandr Kraynovning aytishicha, dunyodagi barcha qidiruv tizimlari to‘liq SI texnologiyasiga asoslanib ulgurgan. Uning fikricha, kelgusi 3-5 yil ichida tibbiyot va ta’lim sohasida ajoyib o‘zgarishlar bo‘lishi kutilmoqda.