O'zbekiston va Xitoy o'rtasidagi madaniy hamkorlik aloqalari yangi bosqichga ko'tarilmoqda

Madaniyat kunlari doirasida , 3-dekabr kuni O‘zbekiston Respublikasi madaniyat vaziri Ozodbek Nazarbekov hamda Xitoy Xalq Respublikasi madaniyat va turizm vaziri o‘rinbosari Lu Yingchuan o‘rtasida hamkorlik uchrashuvi bo‘lib o‘tdi.

Uchrashuvda ikki davlat delegatsiyasi vakillari hamda Xitoyning O‘zbekistondagi favqulodda va muxtor elchisi Yuy Szyun ham ishtirok etdi.

“O‘zbekiston va Xitoy o‘rtasidagi do‘stlik va strategik sheriklik munosabatlari tarixiy ildizlarga ega. Bugun esa bu hamkorlik yangi mazmun kasb etib, madaniy-gumanitar sohada ham yuksak cho‘qqilarga ko‘tarilmoqda. An’anaga asosan, Toshkent va Samarqand shahrida Xitoy madaniyati kunlari tadbirlarining o‘tkazilayotgani madaniy hamkorligimiz yuqori darajada rivojlanayotganini ko‘rsatadi” – dedi vazir Ozodbek Nazarbekov. 

Uchrashuv davomida, so‘nggi yillarda, Xitoy va O‘zbekiston o‘rtasida bir qator madaniy almashinuv tadbirlari amalga oshirilganligi hamda Xitoy ijodiy jamoalari yurtimizda o‘tayotgan har bir xalqaro madaniy tadbirda faol ishtirok etayotganligi alohida ta’kidlandi.

Uchrashuv yakunida, O‘zbekiston va Xitoy o’rtasida madaniyat sohasidagi hamkorlik istiqbollarini yanada rivojlantirish maqsadida bir qator takliflar ko‘rib chiqildi, xususan, 2026-yil uchun madaniy taqvim rejasini tuzish, madaniy meros obyektlaridan birida O‘zbekiston milliy orkestri konsertini tashkil etish, teatrlarimiz o‘rtasidagi hamkorlikni yanada rivojlantirish kabi masalalar ko‘rib chiqildi.

Bildirilgan takliflar ikki tomonlama hamkorlikni yanada mustahkamlanishiga ishonch bildirildi.

Ma’lumot o‘rnida, O‘zbekistonning ikki hududida — poytaxt Toshkent va qadimiy Samarqandda, 30-noyabrdan 4-dekabr kuniga qadar “Xitoy madaniyati kunlari” tadbirlari bo‘lib o‘tmoqda.

Kuni kecha, poytaxtdagi “Turkiston” san’at saroyida “Xitoy madaniyati kunlari” tadbirining rasmiy ochilish marosimi bo‘lib o‘tdi. Ayni kunlarda madaniyat kunlari Samarqandda davom etmoqda.